Kane ka sorkar kam dei kaba wanrah kam pynroi tang ha ka por ba don elekshon : Myntri Rangbah

Nongpoh, Naiwieng 22 : Ha ka jingwan iuh kjat u Myntri rangbah ka jylla u Conrad K. Sangma hynnin ka sngi ha Umsning bad ba la pynlong da ka jingïalang kaba kyrpang ha Auditorium Hall ka Umsning Town Dorbar, ka la long shisha ka jingkmen kaba khraw ïa ki nongïalam, ba hadien ba la pynpaw ïa shibun ki jingdonkam da ka Umsning Town Durbar u Myntri rangbah ka jylla u la kular ban shim khia wat lada ym lah ban pynurlong ïa baroh ki jingdawa.
Ïa ki mat jingdawa kiba bun kiba long na ka bynta ka jingbit jingbiang ki paidbah ka thain Umsning la pynsngew da u Chairman ka Umsning Town Dorbar u Bah Rocky Kylla bad uba la aiti ruh ïa ka dorkhas sha u Myntri Rangbah ha ka jingïalang kaba kyrpang ba la pynlong ha Auditorium Hall ka Umsning Town Dorbar.
Kitei ki mat jingdawa ba la buh da ka Umsning Town Dorbar kumba la pynpaw paidbah da u Chairman ka Umsning Town Dorbar ki kynthup ban pynioh ïa ka Scientific Solid and Waste Management, ka Gallery Stadium bad pynbha ïa ka Madan ïalehkai ha Patarim, ban pynioh ban ker ïa ka jaka ba 10 acre jong ka Umsning town Durbar, ban wan rah ïa ka Fire and Emergency Station ha Umsning, ban shna ïa ka Parking Lot bad ka Market Complex bad kynthup ruh ban pynbha ïa ki surok bad ban pynbha briew ïa ka sor Umsning nalor kiwei kiwei ki mat kiba ba donkam.
Haba kren ha kane ka sngi u Myntri Rangbah ka jylla, u Conrad K. sangma u la pynpaw ïa kaj ingkmen ban ïa don bynta ha kane ka sngi na ka bynta ban ïa kren halor ka bha ka miat bad ka roi ka par jong ki paidbah ka thain umsning bad kum u Myntri Rangbah ula kular ruh ban shim khia halor kitei ki mat ba la wan rah da ka Umsning Town Durbar.
Kiwei kiwei kiba la ïa don lang hakane ka sngi ki kynthup ïa u Mytnri ka tnad C&RD u Bah Sosthenes Sohtun, u MLA ka Umsning u Dr. Celestine Lyngdoh, u MLA ka Mawhati u Bah Charles Marngar, u Chairman ka Umsning town Durbar u Bah Rocky Kylla, ki ophisar bad kiwei kiwei ki riew rangbah bad ki paidbah nongshong shnong ka thain Umsning.
Haba kren ha kane ka sngi kum u kongsan u Myntri Rangbah ka jylla u Conrad K. Sangma u la ong ba kum ki nongïalam ba la pynkup bor da ki paidbah ki don bad u paidbah bad kum ki nongïalam ki hap ban ai kata ka jingshakri kaba dei katkum ka jingdonkam jong u paidbah.
U la ong ruh ba ka sorkar kaba u la ïalam kam dei kata ka sorkar kaba ïarap ïa ki paidbah ne ban wan rah ïa ki kam pynroi tang ha ka por election, hynrei kum ki nongïalam ba la pynkupbor da ki paidbah ki don ryngkat beit bad u paidbah bad ka kamram kum ki nongïalam ka dei ban sngap ïa ka sur jong paidbah bad khamtam ki kam pynroi kiba u paidbah u donkam.
Shuh shuh, u la kren shai ruh da kaba ong ba ki don shibun ki jingdawa ki paidbah ba ka sorkar ka hap ban pynbit pynbiang, hynrei ka sorkar kan nym lah ban leh lut ïa baroh ha kaba kum ki paidbah ki hap ban sngewthuh ba kam long kaba suk ban pynurlong lut ïa baroh ki jingdonkam kiba u paidbah ka jylla u donkam bad wat la katta ruh kum ki nongïalam ne ka sorkar ka kamram jongka ka long ban peit lut ïa baroh na ka bynta ka bit ka bïang bad ka roi ka par ki paidbah ha ka jylla.
Lyngba jong kane ka sngi, ka long ruh ka jingkmen ïa ki paidbah ka thain Umsning ba u Myntri Rangbah u la kular ban shim khia ïa kitei ki mat jingdawa ba la buh da ka Umsning town Durbar bad ka Sport Club khamtam na ka bynta ka Gallery Stadium bad ban pynbha ïa ka madan ha Patarim nalor kiwei kiwei ki jingdonkam ba la buh hakhmat u Myntri Rangbah ka jylla.