Jowai, Naiwieng 22 : Ka Krishi Vigyan Kendra (KVK) Jaiñtia Hills, ka la pynlong ïa ka Live Webcast jong ka 21 Installment halor ka skhim PM Kisan Samman Nidhi kaba la pynlong ha kane ka 19 tarik u Naiwieng ha campus jong ka ha Moopun Wahiajer
Ïa kane ka prokram la sdang da ka jingpynrung kyrteng ïa ki nongrep bad bud sa lai tylli ki jinghikai bala ai da ka kong R. Lyngdoh, SMS (Agronomy), ka kong A. Khongwar, ADO West Jaiñtia Hills, halor ka skhim PM Kisan bad na u D. Lyngdoh, ADH (Marketing).
Ka jingïalang ka la sdang ha ka por shiteng sngi da ka jingkren pdiang sngewbha da ka L. L. Challam, Senior Scientist & Head jong ka KVK Jaiñtia Hills. Ha ka jingkren jong ka, ka la pdiang sngewbha ïa baroh ki nongïashim bynta bad ka la ban jur ïa ka jingdonkam jong ka PM KISAN ha kaba kyrshan ïa ki nongrep ha ka kamai kajih.
La ïoh ruh ka jingkren lyngkot na ka kong K. Sutnga, District Agriculture Officer, West Jaiñtia Hills, kaba la pynsngew halor ka bynta ba kongsan bad ki jingmyntoi jong ka skhim PM Kisan na ka bynta ki paidbah nongrep.
La pynshlur ruh ïa ki nongrep ban shim ïa ki rukom rep kiba kham bha bad kiba lah ban neh bad ka la ban jur ïa ka jingdonkam jong ki jingïarap jong ki stad saian bad ki skim sorkar ha kaba kyntiew ïa ka imlang sahlang jong ki nongrep.
U Kongsan Shri Reformingson Lamare, MDC-Nartiang Wahiajer u la ai jingkren ha katei ka jingïalang bad ula ai khublei ïa ka jingtrei shitom jong ka KVK ha kaba kyrshan ïaki nongrep bad kyntu ruh ïa ki paidbah nongrep ban pyndonkam hok ïa ki skim kum ka PM Kisan na ka bynta ban kyntiew ïaka ïoh ka kot.
Ïa kane ka prokram la pynïaid da ka Risakaru Lyngdoh (SMS Agronomy) bad la ïoh ruh ïa ka jingkren ai khublei na ka kong D Lyngdoh (Program Assistant Technical).
La pynkut ïa ka prokram da ka jingpyni paidbah ïa ka jingkren jong u Myntri Rangbahduh bad ka jingïakren bad ki nongrep ban pynkiew ïa ka buit rep ba kongsan hapoh ka District.
