Yn shong pyrkhat ka Sorkar ban pynkha ki Civil Sub-Division bad C&RD Block: Bah Sniawbhalang

Jowai, Naiwieng 21: U Symbud Myntri Rangbah ka Sorkar jylla u Bah Sniawbhalang Dhar ula ong ba khnang ban pynsuk shuh shuh ïa ki paidbah ka jylla, na ka liang ka sorkar kan sa shong pyrkhat bha ha u snem ban wan ban bishar ïa ki jingtyrwa ba la ïoh lum, halor ki jingdawa ban pynkiew kyrdan ïa ki Civil Sub-Division, ki Block, Police Station, ki Sub-Center bad kiwei kiba don ha kylleng ka jylla.
Haba kren sha ki lad pathai khubor ha ka sngi Thohdieng u Symbud Myntri u la pynsngew halor ka jingdawa ban pynkiew ïa ka Laskeiñ C&RD Block sha ka Civil Sub-Division, ïa kane yn sa pynbeit ha kine ki snem ban wan jong u 2026 ne ha u 2027.
U Bah Dhar ula ong ka sorkar ba mynta ka don ïa ka thong ba hakhmat eh ban trei ïa kaba bha tam na ka bynta ki paidbah nongshong shnong ka jylla khamtam ban pynsuk ha ki jingdonkam jong ki lyngba ki ophis treikam bapher bapher.
“Ym tang ïa ki Civil Sub-Division hynrei ka sorkar ka don ka thong ban pynkha kumjuh ïa kiwei kum ki C&RD Block, ki Police Station, ki Sub-Center bad kiwei ha kaba ka sorkar kan sa shong pyrkhat bha ban leh ïa kaba donkam,” bynrap u Bah Dhar.
Haba jubab ïa ka jingkylli kaba ïadei ban buh sa ka Mini Secretariat ha Khliehriat, ïa kane ula pyntip ba yn sa peitbniah hadien ba la dep shwa ïa ka Mini Secretariat kaba don ka sor Jowai.