Jurip u Bah Sniawbhalang ïa ka Ïawmusiang Market Complex, lap ba 78% la ïaid ka kam

Jowai, Naiwieng 21: U Symbud Myntri Rangbah ka sorkar jylla u Bah Sniawbhalang Dhar ha ryngkat u MLA ka Jowai Constituency u Bah Wailadmiki Shylla ha ka sngi Thohdieng ki la leit jurip ïa ka jingpyntrei thymmai ïa ka ‘Ïawmusiang Market Complex’ bad ïa kane ka projek la tip kum ka (Re-Development of Ïawmusiang Market Jowai).
U Symbud Myntri Rangbah haba ai jingkren sha ki lad pathai khubor u la ong ba ka kam mynta hapoh ka jingpyntrei jong u Contractor ma Pyrkhat Hinge ïa katei ka Complex ka la ïaid shait shait la kumba 78% tam bad ka la sngewskhem ba la kumno kumno ka kam hapoh shisnem yn pyndep noh.
“Ka jingpyndep ïa kane ka ïew kan wanrah jingmyntoi kaba khraw eh na ka bynta ka bha ka miat jong ka Jowai Constituency, namar kane ka ïew kaba dei ka nongbsa ja ïa ka sor Jowai bad ïa ka Ri-Lum Jaiñtia hi baroh kawei,” ong u Bah Dhar.
Ha ka juh ka por ula pyntip katkum ka DPR yn pyndep shwa ïa ka katkum ka plant bad watla ka don ka jingpynkylla ïa ka rukom shna ha ki katto katne ki bynta ka ïew, khamtam ha ki bynta ba pdeng jong ka ïa kaba la thmu ban buh da ka tnum, hynrei la shna noh da ka slab (cement) katkum ka jingdawa jong ka jaka khnang ban shngaiñ hadien habud.
La ong ruh hadien ba la dep ban pynshna ïa kane ka ïew yn peit bad khmih ïa ka da ka Jaiñtia Hills Autonomous District Council (JHDAC) Jowai. Lada don kano kano ka jingduna jong ki dukan bad ka jingdon ki Permit yn sa beit ban leh ïa kaba donkam hadien, la ong u ma Sniawbhalang Dhar.
Ïa kane ka ïew la buuh ïa u mawnongrim ban shna thymmai da u Symbud Myntri Rangbah ka jylla u ma Sniawbhalang Dhar ha ka 13 tarik u Nohprah, 2024 ha ka jinglut kaba 25 klur 60 lak tyngka bad la thmu ban pyndep hapoh 24 bnai.