Shillong, Naiwieng 20: U Chief Executive Officer ka Tura Municipal Board (TMB) JRT?Sangma u la pynmih ka jingpynbna halor ka jingdonkam ban thep kyrteng ïa ki ksew kiba ri ha ïing bad ban kyntiew ïa ka jinglong jingkitkhlieh bad ka jinglong trai ïa la ki jong ki jingri ha kylleng jong ka Tura.
Ha ka jingpynbna ha ka sngi Palei, u CEO u la ong ban pynlong ïa ka jingai jingpynsngewthuh paidbah ka ban sdang naduh ka 8 tarik u nohprah da ka jingïatreilang bad ka Animal Husbandry & Veterinary Department. Kane ka jingsdang ka thmu ban tehlakam ïa ki trai kiba don ïa ki jingri ha la ïing, ban ai ki lad jingïada ïa ki paidbah bad ban peit ba kan ym don ka jingpynlait pathar ïa ki jingri hapoh ka sor Tura.
“Ka thoh kyrteng ïa ki jingri ka long kaba kongsan khnang ban buh ha ki record, ban pynkhlaiñ ïa ki lad ka koit ka khiah ïa ki paidbah, bad ban pynthikna ïa ka jinglong ba kitkhlieh jong ki trai. Nga kyntu ïa baroh ki trai hapoh ka Tura Municipal area ba kin ïatreilang bad kane ka kam ai kyrteng ïa ki jingri bad ban bat ïa ki kyndon ba la pynmih,” ong u Sangma.
U la khot ruh ïa ki Area Development Committee bad ki nongshong shnong ba kin pynsaphriang ïa kane ka jingpynsngewthuh bad ban pynthikna ba kane ka jingïalap kan poi sha manla ki thliew ïing.
“Shuh shuh nga kyrpad ïa ki paidbah ban ai ka jingkyrshan khnang ban pynlong ïa kane ka kam kaba jop bad kaba ai ki lad jingïada ïa ki nongshong shnong,” bynrap u CEO.
