Shillong, Naiwieng 20: U nongaibuit ka tnat ka Koit ka Khiah u Bah Mayralborn Syiem u la pdiang sngewbha ïa ka rai ba dangshen jong ka kynhun Myntri ban pynkylla ïa ka Rule 6 (d) jong ka Ministerial District Establishment Service Rule (MDESR) 2017 kaba wad ïa ki jingpynsuk ka jingpyndap ïa ki jaka ba thylli ba 50% jong ka Group D da ki regular casual worker, kaba ïaid lang bad ka Regular Casual Worker Scheme 1996.
“Nga kmen bad nga kwah ban banjur biang ban ai khublei ïa ka sorkar Meghalaya, sha ka kynhun Myntri ba ka la shim ïa kane ka sienjam ban pynsuk ïa ki nongtrei regular casual hapoh ka jylla kaba long 50% jong ki kam ba thylli ki ban sa pyndap da ki regular casual worker,” ong u Bah Syiem sha ki lad pathai khubor.
“Kane ka kam ka long kaba hajan eh jong ka dohnud jong nga. Nga la rah ïa kane kam na ka por sha ka por bad wat hapoh ka Ïingdorbar Thaw aiñ ka jylla, wat shabar jong ka ïing, bad wat ban thoh sha ka tnat personal bad dangshen, lyngba ka estimate committee ka Meghalaya Assembly kumjuh,” u la ong da kaba bynrap ba kane ka jingpynkylla ka la pynbeit ïa ka jingkulmar kaba la slem bha na ka daw ka jingkulmar, kawei ka dei na ka snem 1996 (50% reservation for regular casual workers) bad kawei na ka snem 2017 kaba ai jingmut ïa baroh ki kam Group D ban pyndap da ka jingthungkam. Kane ka rai ka wanrah biang ïa ka kyndon u snem 1996, kaba pynthikna ba 50% jong ki kam ba thylli ha ka Group D la tyrwa na ka bynta ki nongtrei casual kiba la bit dor, kynthup ka muster roll bad ad hoc staff.
U Bah Syiem u la ai khublei ïa u Myntri Rangbah bad ka Estimate Committee ba ka la ithuh ïa kine ki jingeh bad ban wanrah ka jingpynkylla.
“Kane, la khmih lynti ba kan long ka jingmyntoi kaba bun ïa ki nongtrei casual haba bun ki tnat ka jylla Meghalaya,” u la bynrap.
