Shillong, Naiwieng 20 : Hapoh ki mat treikam jong ka tnad Financial Services, Sorkar India, la ju pynlong ïa ki district-level awareness and assistance camp halor ka Depositor Education and Awareness Fund (DEA Fund) ha kylleng ka jylla Meghalaya kum shi bynta jong ka prokram ai jingtip “Your Money, Your Rights” ba pynlong ha baroh kawei ka ri. Kine ki prokram kin dang bteng ban long ha ki distrik bapher bapher haduh ka 31 tarik u Nohprah 2025.
Kum shi bynta kane ka sienjam, ka State Level Bankers’ Committee (SLBC), Meghalaya, ka la pynbna ïa kane ka prokram ba kyrpang ka ban pynlong ha West Khasi Hills distrik ha ka 21 tarik u Naiwieng 2025, ka ban sdang ha ka por 2 baje nohphaisngi. Yn pynlong ïa kane ka prokram hapoh ka jingïalam jong u District Collector, da ka jingkyrshan jong u Lead District Manager bad ka Lead Bank jong ka distrik. Ha kane ka prokram yn wan ïashim bynta da baroh ki bank, ki kompani insurance, ki tnad bai bam tymmen, ka Securities and Exchange Board of India (SEBI), bad ka Investor Education and Protection Fund (IEPF).
Ha kane ka prokram, yn don ki jaka ai jingïarap ïa ki nongshong shnong ba kin kam ïa ki jingsiew ba ki dei ban ïoh, ba kynthup ïa ki jingkynshew pisa ha ki bank, ki jingsiew insurance, ki dividend, ki share, bad ki mutual fund ba kim pat ïoh. Ki briew kin ïoh jingïarap ruh ha kaba ïadei bad ka jingpynthymmai KYC (Know Your Customer), ka jingpyndap ïa ki phom, bad ka jingpynshisha ïa ki kot ki sla jong ki lada ki donkam ïa kane.
La pynshlur ïa baroh ki briew kiba sah ha ka West Khasi Hills ba kin wan ïashim bynta ha kane ka prokram bad ban shim ïa kane ka kabu kaba la ai da ka Sorkar India. Yn dang pynlong ïa kum kine ki jait prokram ha kiwei kiwei ki distrik jong ka Meghalaya haduh ka 31 tarik u Nohprah 2025.
Lyngba kane ka sienjam, ka State Level Bankers’ Committee, Meghalaya, ka pynskhem ïa ka jingkut jingmut jong ka ban kyntiew ïa ka jingsngewthuh jong ki paidbah, ïada ïa ka hok jong ki nonbei tyngka bad nongkynshew pisa, bad ban pynthikna ba ki briew ki suk ban ïoh ïa ki jingmyntoi ba ki dei ban ïoh. (PIB).
