Shillong, Naiwieng 20: U Nongaibuit jong ka tnat ka Koit ka Khiah bad u MLA ka UDP na Nongpoh u Bah Mayralborn Syiem u la rai ban tynruh na ka bynta ban kyntiew kyrdan noh ïa ka Umshakhen Sub Centre sha ka PHC bad ka jingdonkam ban thung kyrkieh ïa u doctor ha Umden PHC.
Haba kren sha ki lad pathai khubor u Bah Syiem u la ong ba u la khot ka jingïalang bad ka tnat ka Koit ka Khiah ban pynsted ïa kane ka jingdawa kaba la slem bha ban kyntiew kyrdan ïa ka Umshakhen sub centre sha ka Primary Health Centre.
“Kadei ka jingdawa kaba la slem bad ka jingphoh sniew kaba la angnud ba kan wanjia shisha jong ki paidbah ka Raid Mathan hapoh ka Nongpoh constituency,” u la kdew, da kaba bynrap ba kane ka jingtyrwa la dep ban aiti sha ka sorkar bad sha ka planning department bad ba mynta dang ap ïa ka jingpynlait ïa ka pisa na ka tnat.
Haba pynpaw ïa ki jingsngewkhia ba la wanrah da ka Nongthluh Mathan Marmain Development Forum, u Bah Syiem u la ong ba ka Umden PHC ka la ïaid mynta khlem don u ne ka doktor ba wan manla ka sngi ne uba shong basah mynta lah bun bnai.
U la ong ba u la shim ïa kane ka kam ban ïakren bad Director and Commissioner ka Health, da kaba kyntu ban thung noh mardor ïa u doktor.
“Ha ki sngi ban wan baroh ki kam ban thung ïa ki doktor kan sa wan urlong kumta nga kyrpad ïa ki paidbah ba kin long kiba ïaishah katto katne por,” u la pynthikna.
“Nga la skhim khia ïa kane ka kam, la ïasyllok bad ka tnat bad ban ïakren bad u Myntri, bad nga don ka jingkyrmen ba ha ki sngi ban wan kan sa ïoh ka jingmynjur na ka tnat Pla Tyngka. Haba ïadei bad ka Umden PHC, nga kyrpad ba dei ban thung noh mardor ïa u doctor na ka bynta ka jingmyntoi ba bun jong ki paidbah,” ong shuh shuh u Bah Syiem.
