Shillong, Naiwieng 20: Ka sorkar jylla ka la rai ban wanrah ïa ka rukom pyrkhat kam kaba 5 snem kaba buh halor ka targeted public distribution system (TPDS) ha ka jylla.
Ïa kane ka rai la shim ha ka state-level workshop ba la pynlong da ka tnat Food, Civil Supplies, and Consumer Affairs (FCS&CA) da ka jingïatreilang bad ka United Nations World Food Programme (WFP).
Ka TPDS ka dei ka atiar halor ka jingpyrshang jong ka Meghalaya ban kynjoh ïa ka Sustainable Development Goal (SDG) 2: bym don jingthngan shuh ne Zero Hunger.
Kane ka thong kan pynkhlaiñ ïa ka jingshngaiñ ka jingdon ka bam ha ka jylla, kaba pynïoh ka bam ïa palat 21 lak ngut ki paidbah, malu mala kumba 80 per cent na ka jingbun paid ka jylla.
Haba pynïaid ïa ka workshop, u Myntri ka tnat Food Civil Supplies & Consumer Affairs u Bah Methodius Dkhar u la ong, “Ban pynthikna ka jingsngaiñ ka bam ïa baroh ki nongshong shnong ka Meghalaya, khamtam kito kiba sah sha kyndong bad ki kynhun kiba tlot ka ïoh ka kot, ka dei ka kam kaba hakhmat eh jong ngi. Kane ka workshop ka dei ka sienjam kaba kongsan ha ka jingïatreilang bad ki paralok kum ka WFP ban pynïaid shakhmat, kynthup ki plan ba kyrpang na ka bynta ka TPDS. Da kaba wanrah ki jingkylla lyngba ki lad digital bad ki kam ban ai ki jingsakhi, ngi buh ka thong ban wanrah ka rukom treikam sam bam kaba ïaid beit khlem don kiba shah ieh shadien.”
Representative bad Country Director, World Food Programme India Elisabeth Faure la ong, “Ka WFP ka sngewsarong ban kyrshan ïa kane ka jingïaid lynti jong ka jingwanrah jingkylla. Lyngba ki lad jingïashim bynta bad ki lad shim jingkheiñ, ngi kyrmen ban kyrshan ïa ka Meghalaya ban pynpaw ba kumno ka kam sambam bad ki lad ïada jinglut ki ïaid lang na ka bynta manla ki thliew ïing.”
Kane ka jingthmu ka long ruh ban wanrah ka jingpynïasohlang da ka TPDS bad ki bynta kum ka kam batei met, ka rep ka riang, ki lad kamai, bad ki kam pynroi ha thaiñ nongkyndong.
La dep ruh ban thaw ïa ki lad jingtip ne ki jingkdew kiba bniah, kaba pynpaw ïa ka por kaba shai, ki bynta ki jingkitkhlieh, bad ki jingpeitngor haor ki jingpyntreikam ïa ka sam bam.
