Shillong, Naiwieng 19: Ka kynhun ki rangïalehkai kriket U-23 jong ka jylla Meghalaya ka la wanrah ïa ka jingïalehkai kaba khlem jingduna ban jop suk da 136 ron ïa ka phainal jong ka plate group ha ka lympung BCCI’s State A Trophy 2025-26 pyrshah ïa ka Mizoram hynne ka sngi Balang ha Mohali.
Lah ban kdew ba ka kynhun ki rangïalehkai jong ka Meghalaya ka la long kaba janai bha ha baroh kawei ka lympung, da kaba jop ïa baroh san tylli ki jingïalehkai group stage ryngkat bad ka phainal bad ka la pynthikna ïa ka jaka ban ïoh ïakhun ha ka elite group ha ka samoi ban wan.
Na ka liang jong u President ka Meghalaya Cricket Association u Nababrata Bhattacharjee bad u Honorary Secretary u Rayonald Kharkamni, ki la phah ïa ki kyntien ai khublei ïa ka kynhun hadien kane ka jingjop.
Hadien ba ka la jop ïa ka jingkynting pisa (toss) bad jied ban tied nyngkong, ka Meghalaya ka la ïaid shakhmat ban buh ïa ka thong kaba shyrkhei, haduh 307 ron da kaba khyllem 7 wiket ha ki 50 ober ba la mang. U Pushkar Raj Singh u la long u nongtied ba kongsan tam da kaba kamai 105 ron (not out). Haba pyrshah beh, ka Mizoram ka la sahdien ha man ka khyllipmat ban kynjoh ïa ka thong bad ka la shah pynkhyllem noh tang na bynta 171 ron ha ki 43 ober.
U Dipankar Baruah, uba la kamai spah ron ha ka jingïalehkai ba la dep, u la ïoh mad biang sa kawei ka sngi kaba seisoh, ha kaba u la noh synñiang 51 ron naki 78 tylli ki bol. U la ïoh ïa ka jingkyrshan na u Shavian Blah naduh ka over kaba ar bad ryngkat lang ki la noh synñiang 104 ron na ka bynta u wiket uba ar. U Shavian u la thlieh naphang khyndai tylli ki saw ron (fours) bad san tylli ki hynriew ron (six) ban kynjoh ïa ka 76 ron kaba stet na ki 54 tylli ki bol.
U Shavian u la shah weng noh ha u Sahil Sharma (2/61) hynrei u Dipankar u la bteng ban seng ïa ka nongrim kaba skhem na ka bynta ka Meghalaya ha ka jingïatreilang bad u Pushkar, bad kine ki shijur ki la bynrap sa 81 ron na ka bynta u wiket uba lai haduh ba u Dipankar un shah pynhap noh ha u Nasib (3/59). Dei hangne ba u Pushkar u la ïohlad ban dang pynkhraw ïa ka thong – da kaba kamai 105 ron naki 115 tylli ki bol, kiba kynthup ïa 11 tylli ki saw ron (fours) bad ka strike rate kaba 91.30.
Kane ka la ïarap ïa ka Meghalaya ban buh ïa ka thong kaba shongkun, ha kaba ka Mizoram ka la shem jingeh ban jubab.
Ki nongtied ba hakhmat jong ka Mizoram ki la lah ban neh kham slem, da kaba duh tang 2 wiket ha ki 25 ober bad kamai 115 ron, hynrei ki la duh saw wiket na ka bynta ban pyndap tang 11 ron ka la pynlong ïa ka jingpyrshang kamai ron ban hiar sha ka 126/6, kaba kynthup ïa u nongtied ba kongsan tam jong ki u Tetea (41). Ka jingkheiñ ban kamai ron ka la sdang ban shah ktah ha kane ka por bad ka jingïalehkai ka la poi sha kaba kut ha kaba ki la duh noh ïa ki saw tylli ki wiket ba khatduh na ka bynta 6 ron.
Baroh ki nongkawang bol ba stet bad spin jong ka Meghalaya ki la ïoh ban pynhap wiket, ha kaba u Manish Sharma u la khur 3/30 bad u Shavian 3/51. U Pushkar (2/13) bad u Gavineal Marpna (2/22) ki la ïoh ban weng mar ar wiket.
U Dipankar uba la shah kyntiew kyrdan na ka kynhun ïalehkai U-19 mynta ka samoi, u la pyndep ha ka kyrdan ba ar kum u nongtied ba kamai bun ron ha kane ka lympung da kaba kamai 254 ron ha ki hynriew tylli ki inning. Ha ka liang ka bowling, u Manish bad u Shavian baroh arngut ki la khur 11 tylli ki wiket ban ïasoh lang na ka bynta ka kyrdan kaba lai, katba u Gavineal u wan ha ka kyrdan kaba san da kaba khur 10 wiket.
Ka Meghalaya – kaba la ïalam da u coach u Neetesh Sharma bad u assistant coach u Shiva R Sangma – kadei ban sngew sarong ha kaba ïadei bad ka jinglong jingman jong kane ka jingjop, namar ka jingïatreilang kaba pynlong ïa ka jylla ban don ha ka kyrdan kaba skhem na ka bynta ki aïom ban wan. Ka burom ka leit ruh sha ki support staff kiba la synran lang ïa ki nongïalehkai – u Emidao Dhar (physio), u Skhembor Khongbtep (trainer) bad Wonderful E Pakyntein (manager).
