Wan poi ki tyngshop bad puron Bollywood ha USTM ban pynlait paidbah ïa ka phlim ‘Bihu Attack’

Nongpoh, Naiwieng, 18: Ha ka sien kaba nyngkong ki Actor bad Actress ba pawnam ka Bollywood mynta ka sngi ki la wan poi ha ka skulbah University of Science and Technology, Meghalaya, kiba kynthup ïa ka Daisy Shah, Dev Menaria, Hiten Tejwani, Mubeen Saudagar, Jitt Raidutt, Pallavi Debnath bad u Dimpu Baruah na ka bynta ban pynlait ïa kawei ka phlim Bollywood kaba thymmai kaba la ai kyrteng ka ‘Bihu Attack’ bad mynta ka sngi ka dei ruh ka lyngkhuh sngi kha jong u Zubeen Garg.
Ha kane ka sngi ka skulbah USTM ka la leh burom ruh ïa ka sngi kha jong Zubeen Garg, uba dei uwei na u nongwai ba paw ha ka ri bad uba dei na ka jylla Asssam uba dang shu dep khlad shen mynta u snem.Kum ka jingburom ïa une u nongwai ba paw, ha kane ka sng kha jong u la pynrwai kyrpang ruh ïa ka jingrwai kaba u la dep thaw bad kaba dei ruh ka jingrwai kaba paw bha.
Ki Actor bad Actress na Bollywood ha kane ka sngi ki la pynlait paidbah ïa ka jingrwai kyrpang bad ïa ka Teaser katei ka phlim ka ban sa pyni paidbah ïa ka phlim ba pura ha ka 14 tarik u Kyllalyngkot 2026 ha ki rynsan Cinema. Kane ka phlim ka dei ruh ka phlim ba la pynwan dur halor ka jingshah hiar thma ba shyrkhei bad ban kyntiew ïa ka jinglong kyrpang ki nongshong shnong ka Assam kaba ïa dei ruh halor ka jingleh niam Bihu.
Haba kren sha ki nongthoh khubor, ka Actress Daisy Shah bad u Dev Menaria, ki la pan ïa kata ka jingkyrshan kaba pura na ki paidbah ba kin peit ïa katei ka phlim ba thymmai ba shen yn sa pyni paidbah ha ki cenema hall bapher bapher.
Ki la pynpaw ruh ba kane ka phlim u Zubeen Garg kum u nongrwai ba paw ha ka ri bad khamtam ha ka jylla Assam, u la shim ka bynta kaba khraw bha ha kae ka phlim bad kane ka sngi ka la long ruh ka sngi kaba kmen bha ba la lah ban pynlait ïa ka Teaser katei ka Phlim Bihu Attack kaba long ruh kum ka jingkynmaw burom ïa ka lyngkhuh sgi kha jong u Zubeen Garg.