Plie u lat ka jylla ïa ka Regional Agri Fair ba 3 sngi ha Kyrdem Kulai ryngkat ki jingpyninam ïa ki mar rep

Nongpoh, Naiwieng 17: Ka Regional Agri Fair ba 3 sngi, kawei naki jingïalang kaba heh jong ki nongrep, ki riewstad ka rep ka riang, ki nongsengkam lajong na kylleng ki jylla ka thaiñ Shatei Lam Mihngi kala sdang mynta ka sngi ha College of Agriculture, Kyrdemkulai da ka jingangnud ban kyntiew ïaki nongrep, ban sam ïaka jingnang jingtip bad ka jingstad ha kaba ïadei kumno ban kyntiew ïaka rep ka riang ban wanrah ki jingkylla haka thaiñ Shatei Lam Mihngi.
Ïa katei ka prokram ba 3 sngi lynter la pynlong da ka Central Agricultural University, Imphal, Manipur bala wan ruh ban plie paidbah da u lat ka jylla, u CH Vijayashankar, haka jingdonlang u Timothy D Shira, Myntri ka tnad ka rep ka riang ka jylla, u Kamakhya Prasad Tasa MP ka Rajya Sabha na Assam, u Dr Anupam Mishra Vice Chancellor ka CAU, Imphal, ka kong Triniti Saioo ka nongshem jong ka Iengskhem Spice Producer Industrial Cooperative Society bad ka Padma Shree Awardee, ki nongrep na kylleng ka thaiñ shatei lam mihngi, ki ophisar, ki riewstad ka rep ka riang bad kiwei kiwei.
Ha kane ka prokram ba 3 sngi ki don ruh ki jingïakop bapher bapher naduh ka jingpyninam ïaki jhur ki jhep bad ki mar rep mar riang ban pyni ïaka jingriewspah bad ka jingkiew sted ka rep ka riang haka thaiñ Shatei Lam Mihngi ka ri India, bad nalor kitei ki jingïakop, ki don ruh kumba 74 tylli ki dukan ne ki stall ban pyninam ïaki mar rep, ki tiar ka rep ka riang katkum ka juk stad mynta, ryngkat ki symbai ba lai phew jait kiba lah ban kyntiew bad pynmih bun ki mar rep, kaba long ruh kum ka jingkieng ban ïasam ïaka jingstad hapdeng ki nongrep ka thaiñ Shatei Lam mihngi ka ri ban don ruh ka jingïadei ba jan.
Haba kren ha kane ka sngi naka liang u Lat ka jylla u CH Vijayashankar u la ong ba ka Ri India ka de ka ri ba bun ki nongrep ha kaba kumba 70% ki de ki nongrep bad kiba im lyngba ka kam rep ka kam riang.
U la ong ruh ba ka lada ka ki nongrep ki kiew ha ka rep ka riang bad ki lah ban kyrshan ïa lade lyngba ki kam rep ki kam riang, ka ri India ruh kan dang kiew ha baroh ki liang bad ban kyntiew ïa ki kam rep ki kam riang donkam ka jingïatrei lang na baroh ki liang ban kyntiew ïa ki nongrep.
U la ong ruh ba kane ka jingpynlong ïa kane ka Agri-Fair ka dei ruh ka jingrakhe jong ka ri India ïa ka jingkiew shaphrang ka kam rep ka kam riang bad ka long ruh shi bynta ban ai burom ïa ka CAU Imphal kaba la trei shitom ban kyntiew ïa ki kam rep ki kam riang katkum ka juk stad ba mynta lyngba ki kor ki bor..
Shuh shuh, u la pynpaw ruh ba ka jyllla Meghalaya ka dei ka jylla ba la riew spah ha ka jingdon ki kymbat dawai ne ka rukom sumar tynrai (Land of Auyurveda) bad ka jaka kaba itynnad ban khring ïa ki nongjngohkai pyrthei, kaba dei lyngba ka jingdon kita ki riew ieit mariang bad kiba briew kiba don ka jingiohi jngai kiba im hapdeng ka jingsuk jingsain.
Ha kane ka sngi sdang ka Agri-fair la ioh ruh ba plie paidbah ïa ka Hostel ki khynnah shynrang bad ka jingpyni nam ïa ki dukan bapher bapher, ka jingpynlait paidbah ïa ka RAF Souvenir, ka CAU Newsletters, CAU Farm Magazine bad ka jingpynlait paidbah ïa ka Kot bad ka jingleh burom ïa ki riew heh ki riew hain.