Shillong, Naiwieng 17: Ka Meghalaya ka la lah ban pynliem noh ïa ka Mizoram da 23 ron ha ka jingïakhun kaba itynnad bha ha ka lympung State A Trophy 2025-26 plate group kaba la long hynne ka sngi Nyngkong ha Chandigarh.
U Dipankar Baruah u la mad ïa ka jingïalehkai kaba kyrpang da kaba khyrwit spah ron, ha kaba u la pynkut ïa ka pali tied (inning) jong ka Meghalaya da kaba kamai 101 ron khlem da shah weng (Not out) na ki 139 tylli ki bol (9x4s, 2x6s), katba u Md Ashif Khan u la noh synñiang 72 ron naki 72 tylli ki bol (6x4s, 1x6s).
Kane ka resol ka mut ba ka Meghalaya kan jam sha ka phainal da ka rekod jingjop kaba paka namar ka la jop baroh 5 sien na ki 5 tylli ki jingïalehkai. Na ka bynta ka Mizoram kaba bud nadien ha ka kyrdan kaba ar ha ka Group, kane ka dei ka jingshah rem kaba nyngkong eh.
Ka Meghalaya ka la jop ïa ka jingkynting pisa (toss) bad ka la jied ban tied nyngkong hynrei kane ka jingïalehkai ka la shah pynthut hadien ba la sdang namar ka don ka bynta jong ka madan kaba sngem bad la pynduna ïa ka over sha ka 44 ober ïa baroh arliang.
Ka Meghalaya ka la kamai 217 ron bad khyllem 2 wiket ha kaba kut jong ka pali tied jong ka bad ka Mizoram ka la hap ban beh ïa ka thong ba la pynthymmai kaba long 220 ban jop na ki 44 ober katkum ka VJD Method. Hynrei ki la shah pynkhyllem noh da tang 196 ron ha ki 41.3 ober.
U Dipankar bad u Ashif ki la pynskhem ïalade, da kaba sdang jai-jai bad husiar bha shuwa ban pynstet ïa ka jingïalehkai ynda ka jingïatreilang hapdeng jong ki ka la skhem. Ka Mizoram ka la pyndonkam 8 ngut ki nongkawang bol bapher bapher hynrei khlem da don kiba lah ban seisoh.
Haba beh ïa ka thong kaba lah ban kynjoh, ka Mizoram ka la sdang ha ka rukom kaba biang ha kaba u Johan u la kamai 85 ron tang naki 69 tylli ki bol bad u Sahil Sharma u la kamai 66 ron na ki 96 bol. Kitei ki arngut ki la noh synñiang 139 ron na ka bynta u wiket ba nyngkong bad ki la buh ïa ka kynhun ha ka jingkyrmen kaba skhem. Hynrei u Johan u la shah weng noh ha u Shavian Blah (2/18 ha ki 5 ober) bad dei hangne ba ka la sdang ka jingkhyllem ki wiket u wei hadien u wei, ha kaba baroh 10 wiket ki la hap lut tang na ka bynta 57 ron.
U Denikcheng Marak u la pynkut kum u nongkawang bol uba seisoh tam jong ka Meghalaya da ka jingkheiñ kaba 3/49 ha ki 9 ober, katba u Chandra Bahadur Thapa u la khur 2/33 ha ki 9 ober na ka bynta ka jingjop kaba khraw pyrshah ïa ka kynhun ïalehkai kaba tbit bha.
Ka Meghalaya bad ka Mizoram kin ïakynduh biang sa shi sien, ha kane ka kynti kan dei ha ka jingïakhun phainal, ka ban long ha ka sngi Balang, ha Mohali.
