Dang klumar jingmut ki paitbah ka thaiñ Malangkona halor u pud ba thikna bad ka Assam

Nongstoiñ, Naiwieng, 16: Ki paitbah nong hong shnong jong ka thaiñ Malangkona haduh mynta, ki dang klumar jingmut bha ha kaba ïadei bad u pud u sam wat la ka sorkar ka la pynbna ba ïa ki jaka kiba hap ha ka Hahim sector kiba kynthup naduh Upper Tarabari, Thanghula, Garojan, Balsrek, Huhapara, Salbari bad baroh shilynter haduh ban da ïakynduh bad ki jaka kiba hap ha ka Langpih sector.
Hadien ba ka sorkar ka la pynbna ba ïa ki jaka kiba hap ha katei ka thaiñ la dep pynbeit bad la dep sieh ruh ïa ki mawpud maw maw sam ban pynthikna katno tylli ki shnong kiba hap ha Meghalaya bad katno tylli ki shnong kiba la shah khynñiat sha ka Assam, u nongthoh khubor ha ka sngi saitjaiñ ba la dep u la ïakynduh ïa ki paitbah nongshong shnong ban twad jingmut bad ban kylli pyrthew la ki la don jingtip ne em ïa ki shnong ki thaw kiba hap ha Meghalaya bad ki la don jingtip ne em haduh katno tylli ki maw pud ka sorkar ka la dep sieh ban pynthikna ba la dep ïa pynbeit.
Ha kaba ïadei bad katei ka mat la ïoh ban ïakren bad ki riew tymmen, ki longkmie bad ki rangbah na ki katto katne ki shnong kum ha Salbari, Gahonimara, Bakdrop, Aberam bad kiwei kiwei. Kitei ki rangbah bad ki longkmie na kitei ki shnong ki la ong ba ki la ïoh sngew ba ka sorkar ka la pynbna ba ka la dep ïapynbeit ïa ki jaka bad ka Assam, hynrei haduh mynta kam pat ai kano kano ka jingpyntip da ki jingthoh ban kdew ba u pud u sam bad ka jylla Assam u dei naduh kino ki jaka.
Nalor kata ki la ong ruh ba naduh ba ka sorkar ka la pynbna ba la dep pynbeit ki pulit Assam kim ju kham wan shuh ban tuklar ha kitei ki shnong. Ki la ong ruh ban ka jing don jong ka Meghalaya Police Out Post ha Salbari ka lah ban long ba ki pulit Assam ki la kham shynraiñ ban wan tuklar than.
Ki riew tymmen kiba shong ba sah ha ka shnong Aberam, ki la ong ba katei ka jaka kaba ki shong ki sah kam dei ka khyndew shimet ne ka khyndew shnong, hynrei kadei ka khyndew kaba la long trai da ki briew kiba shong shnong ha Langdongdai kiba dei ruh na ka jait Ñianglang.
Ki la ong ruh ba ki shong ha katei ka shnong la slem bah tangba ki shu shong wai namar ba ki im da kaba rep kwai, tympew, kba bad kiwei kiwei ki mar rep. Kumta wat la ki la long ki trai shnong ha katei ka jaka hynrei ki hap ban siew pat da ka khajna sha ki trai khyndew man la u snem.
Nalor kata ki la ong ba watla ki dei tang ki nongshong ruh, naduh ka por ba ym pat ïoh ïa ka jylla ba pura ruh kito kiba shong ha ki khyndew kur ki ha kaba ki hap ban siew khajna sha ki rangbah Kur, katba kito kiba shong ha ki jaka jong ka hima ki hap ban siew khajna sha u Sirdar jong ka hima Nonglang Sirdarship.
Ki la ong ruh ba lada ka sorkar ka la dep sieh ïa ki mawpud maw sam ka la dei ban pynshai sha ki paitbah haduh katno tylli ka la dep sieh bad haduh hangno, khnang ba ki paitbah nongshong shnong kin sngew skhem bad sngew trai ba ka dei ka jaka ka jong ki.