Mawkyrwat, Naiwieng 15 : Kum shibynta ban pyntreikam bad pyndonkam ïa ki jinghikai katkum ka juk jong ka saïan bad teknologi ha ki skul pule, na ka liang ka Allumni Association jong ka Nativity Higher Secondary School, Mawkyrwat mynta ka sngi Palei jong ka taïew ki la leit ban noh synñiang da ki ‘AI & Robotics Lab’ hapoh ka Nativity Higher Secondary School, Mawkyrwat kawei ka skul kaba hapoh ka South West Khasi Hills District.
U bah Kynpham V. Kharlyngdoh, President ka Allumni Association jong ka Nativity Higher Secondary School, Mawkyrwat haba kren ha ka jingïalang u la kyntu ïa ki khynnah skul bad ki nonghikai ba haba la ai ïa kine ki tiar ban pyndonkam ki dei ban pyndonkam ha ka rukom kaba dei katkum ka jinglah jong ki khnang ba kan long ka jingmyntoi ïa ki ha ka liang jong ka jingnang jingstad katkum ka juk.
U la ong ruh ba kine ki ‘AI & Robotics Lab’ ki long ki tiar ba nyngkong eh ban sam hapoh kane ka skul bad wat hapoh ki skul kiba don hapoh West Khasi Hills District, ha Eastern West Khasi Hills District bad ha South West Khasi Hills District.
Kiba la ïa donlang ha kane ka sngi ki long naduh u bah Kynpham V. Kharlyngdoh uba dei President ka Allumni Association jong ka Nativity Higher Secondary School, Mawkyrwat, u bah S. Marweiñ uba dei u General Secretary jong ka Allumni Association jong ka Nativity Higher Secondary School, Mawkyrwat, ki dkhot ka Allumni Association, ki khynnah skul bad ki nonghikai.
