State A Trophy 2025-26: Pynliem ka Meghalaya ïa ka Nagaland da 8 wiket ban khur ïa ka jingjop kaba saw

Shillong, Naiwieng 15: Ka Meghalaya ka la pynliem noh ïa ka Nagaland da 8 wiket ban khur ïa ka jingjop kaba saw sien lynter ha ka jingïalehkai jong ka lympung ‘U-23 mens State A Trophy 2025-26 plate group ha Mohali kaba la long ha ka sngi Saitjaiñ.
Ka Meghalaya ka la jop ïa ka jingkynting pisa (toss) bad aiti ïa ka Nagaland ba kan tied nyngkong, hynrei kane ka liang pyrshah ka la shah pynkhyllem baroh ki wiket tang na ka bynta 85 ron na ki 32.1 ober. Nangta ka Meghalaya ka la beh ïa kane ka thong kaba duna tang haki 23.2 ober da kaba hap tang ar wiket.
U Raja Swarnkar u dei u nongtied ba seisoh jong ka Nagaland da kaba kamai 25 ron, katba u Chandra Bahadur Thapa u dei u nongkawang bol ba seisoh tam jong ka Meghalaya da ka khur 3 wiket bad ailad tang 9 ron na ki 5.1 ober ki jong u.
U Chandra Bahadur Thapa, u dei uba khatduh na ki hynriew ngut ki nongkawang bol ba la ïoh bynta hynrei u la paw ba u long uba shyrkhei tam napdeng jong ki. U Shavian Blah ruh u la mad ïa ka jingïalehkai kaba kyrpang, da kaba khur 3 wiket bad ailad tang 20 ron naki 6 ober, katba u Gavineal Marpna u la pynhap 2 wiket bad ailad tang 9 ron naki 8 ober. U Pushkar Raj singh (khur 1/8 naki 3 ober) bad u Denikcheng Marak (khur 1/12 naki 5 ober) kidei kiwei pat kiba la ïoh ban pynhap wiket na ka bynta ka kynhun.
Ha ka jingïakhun ban beh ïa ka thong, ki arngut ki nongtied ba sdang nyngkong jong ka Meghalaya kata u Dipankar Baruah bad u Thunun Marak ki la ïalehkai bha. Ki la nohsynñiang 50 ron ha ki 15 ober eiei bad kin jin da la thmu ban ïalam dalade ïa ka Meghalaya shaduh ka jingjop hynrei u Dipankar u la shah pynhap noh tang na ka bynta 33 ron na ki 51 tylli ki bol (3x4s, 1×6) da u Kelhousilie Zaputou (2/37), uba nangta un bteng ban pynkhyllem noh ïa u Shavian khlem da ailad wat tang shi ron.
Hynrei u Thunun (29 khlem shah pynhap, 67 bol, 5×4) bad u Md Ashif Khan (16 khlem shah pynhap, na ki 16 bol, 3×4) ki la tied pyndep ïa ka ron ba dang sah ryngkat ha ka jingïatreilang kaba khlem sangeh ban nohsynñiang 27 ron.
Ka Meghalaya kan pynkhreh sa ïa ka jingïalehkai kaba khatduh, pyrshah ïa kawei pat ka kynhun ka bym pat shah rem ha ka Group – ka Mizoram – ha ka sngi Nyngkong ha Chandigarh.