Nongpoh, Naiwieng 15: Kum ka jingai mynsiem ïa ka tnad Pulit na Ri Bhoi District kiba la trei shitom ban ïa khun pyrshah ïa ki kam sniew bad kumjuh ruh ban tehlakam ïa ki Kali ba pynkheiñ ain ba ju wan rah ki jingjia ba sngewsih ha ka surokbah ha Ri Bhoi District, ka Alpha English Higher Secondary School Nongpoh shi bynta na ka jingrakhe ïa ka sngi kyrpang ki khynnah (Children’s day) hynnin ka sngi ki la leh burom ïa u Senior Superintendent of Police ka Ri Bhoi u V.S Rathore lem bad ka ïa ka tnad pulit da kaba ai kyrpang lyngba ka khusnam ban ïaroh ïa ka tnad Pulit kaba la shim khia bha ban ai ka jingïada ïa ki paidbah ba leit ba wan ha ka surokbah lyngba ka jingpyrkhing ïa ki Kali ba pynkheiñ aiñ.
Kawei na ka jingthoh kaba ai mynsiem ïa ki Pulit ka Ri Bhoi ba la ai sngewbha da ka Alpha English Higher Secondary School Nongpoh ka dei ka jingthoh kaba ong ha ka ktien nongwei, ‘ Thank you being the guardian angels of our streets..’ kaba kut ba ki Pulit ki dei kita ki Angel nongïada ïa ki khynnah skul bad ki paidbah ha ki surok ban lait na ki jingma jingmynsaw.
Ha ka jingïalam u Babu Anand Swer kum u nonghikai lem bad ki samla ba pule Klas- X, ki la leit ban kynduh kyrpang ïa u Senior superintendent of Police ka Ri Bhoi u V.S Rathore ryngkat ka jingdon lang u Traffic Incharge ka Nongpoh Police Station u Rubul Ali, ki samla pule ki la ai sngewbha da ki khusnam kaba long shi bynta ka jingburom halor ka jingtrei shitom bad ka jinglen lada ka tnad Puit ban tehlakam ïa ki kali ba pynkheiñ ain na ka bynta ka jingshngaiñ ki paidbah bad khamtam ki khynnah skul ha ka leit ka wan ha ka surokbah National Highway-6 ha Ri Bhoi District.
Kum ban pynpaw, kane ka jingleit ai sngewbha ka skul Alpha English Higher Secondary School Nongoh da ki jingai sngewbha ïa u SSP ka Ri Bhoi, ka dei ruh ba ki paidbah ha Ri Bhoi ki sakhi halor ka jingtrei shitom ka tnad Pulit na Ri Bhoi ban pynlong ïa ka surokbah National Highway-6 bad kiwei ki surok paidbah ban shngaiñ ki paidbah ha ka leit ka wan kaba dei lyngba ka jingshim khia ka tnad Pulit ban tehlakam ïa ki kali ba pynkheiñ ain bad la sakhi ruh bun ki Kali ba pynkheiñ ain ki shah dain kuna bad shah tehlakam.
Kumba la pynpaw da u Senior Superintendent of Police ka Ri Bhoi, u V.S Rathore, u la ong kane ka jingburom bad ka jingai sngewbha ka Alpha English Higher Secondary School Nongpoh ban ai mynsiem ïa ka jingshakri ka tnad Pulit ka long shisha ka jingai mynsiem ruh ïa ka tnad Pulit ba kan dang lah ban trei kham bha na ka byntaka jingshngain ki paidbah ha ka leit ka wan ha Ri Bhoi District.
Shuh shuh, u la khublei kyrpang ruh ïa ka skul Alpha English Higher Secondary School kaba la ai ka jingïaroh bad ka jingai mynsiem ïa ka tnad Pulit kiba trei na ka bynta ka jingshngaiñ ki paidbah bad na ka liang ka tnad Pulit na Ri Bhoi kan dang ïaid bteng ban tehlakam ïa baroh ki kam sniew bad kynthup ruh ïa kino kino ki Kali ba pynkheiñ aiñ khnang ba shngaiñ ki paidbah ha ka leit ka wan bad ban lait ruh na shibun ki jingjia ba sngewsih kiba ju jia tang na ka daw ka jingdon ki Kali ba pynkheiñ aiñ, u la bynrap.
