U Khabib Abdulmanapovich Nurmagomedov u dei u nongïalehkai Mixed Martial Arts ba satar bha na Russia uba la ïakhun ha ka kyrdan Lightweight jong ka Ultimate Fighting Championship (UFC). U dei u rangïakhun ba bat slem tam ïa ka nam lahduh ha ka kyrdan Lightweight jong ka UFC, ha kaba u la bat ïa ka burom naduh u bnai ïaïong 2018 haduh u bnai Lber 2021. Da kaba jop 29 sien bad khlem shah rem, u la shongthait noh da ka rekod ba paka na ka rynsan ïakhun MMA khlem da mad ïa ka jingshah rem. La shim ba u Nurmagomedov u dei uwei na ki nongïalehkai MMA ba kynsai tam ha ki por baroh (greatest mixed martial artists of all time), bad la pynrung ïa u ha ka ‘UFC Hall of Fame’ ha ka 30 tarik u Jylliew, 2022.
U Nurmagomedov uba la rah nam lahduh ar sien ha ka pyrthei ha ka jingïalehkai Sambo Combat, u don ka jingshemphang kaba ïar bha ha ka jingïalehkai wrestling, judo, bad sambo. U Nurmagomedov u la don ha ka kyrdan ba nyngkong (#1) ha ka thup kyrdan jong ka ‘UFC Men’s Pound-for-Pound Ranking’, ha ka por shuwa ba un shongthait, haduh ba un da shah weng noh hadien ka jingshongthait jong u ha u bnai Lber 2021. Ka Fight Matrix ka buh ïa u ha ka kyrdan ba nyngkong (#1) kum u rang ïalehkai ba satar bad uba shyrkhei tam ha ka Lightweight. Ha u snem 2019, ka Forbes ka la buh ïa u Nurmagomedov kum u nongïalehkai Sports ba seisoh tam na Russia; U Nurmagomedov u la wan ruh ha khlieh duh ha ka thup jong ki 40 ngut ki riew pawkhmat kiba seisoh tam ha ka kam khaiï bad ïalehkai ha Russia kiba hapoh 40 snem ka rta.
U Nurmagomedov u dei ruh u nonghikai ïalehkai mixed martial arts bad u nongpynïaid, uba la pawnam na ka bynta ka jingseng ïa ka Eagles MMA bad ban kyntiew ïa ka Eagle Fighting Championship (EFC). Hadien ba u la shongthait, u la kylla long u coach ba pura bad u cornerman ba pura shuwa ban shongthait pura na ka jingïalehkai ha u bnai Kyllalyngkot 2023. Ha ka jingim jong u baroh kawei, u Nurmagomedov u la kylla long ka phang jong kiba bun ki jingïakynad, kynthup ïa ka jingïadei kaba la slem bha bad u nongïalam ka Chechnya, u Ramzan Kadyrov, ki jingïadei kiba don jingkylli bad ki nongsynshar, ka jingïasaid ban pynjur ïa ka jingpynïaid beit ïa ka kolshor bad ka jingsngew pyrshah ïa ki kynthei.
Ka jingim ba dang rit jong u Nurmagomedov:
La kha ïa u Khabib Abdulmanapovich Nurmagomedov ha ka longïing Avar ha ka 20 tarik u Nailur 1988 ha ka shnong Sildi ha ka Tsumadinsky District jong ka Dagestan ASSR, ka ri kaba synshar hi hapoh ka Russian SFSR, ka Union Soviet. U don ïa u hynmen uba kham heh, u Magomed, bad ka para kaba kham rit, ka Amina. Ka longïing jong u kpa jong u ka la kynriah na Sildi sha Kirovaul, ha kaba u kpa jong u Khabib u la pynkylla ïa ka mala ba shapoh jong ka ïingsah kaba ar mala sha ka jaka kilanmet (Gym). U Nurmagomedov u la heh la san ryngkat lang shipara. Ka jingsngewtynnad jong u ïa ka kam ïalehkai Martial Arts ka la sdang naduh ba u peit ïa ki khynnah samla kiba kilanmet ha ka jaka lehkai. Ka jingkilanmet kaba shyrkhei bad kaba la pawnam bha jong u Khabib ha ka por ba u dang khynnah ka kynthup ïa ka jingpyrshang lehkai wrestling bad u Dngiem ha ka por ba u dang don tang 9 snem ka rta.
Kumba ju long bad kiba bun ki khynnah ha Dagestan, u la sdang ban ïalehkai wrestling naduh ba u dang rit: u la sdang ha ka rta kaba 8 snem hapoh ka jingsumar jong u kpa jong u, u Abdulmanap Nurmagomedov. U nongïalehkai ba la shemphang bha bad u rangbah shipai Soviet, u Abdulmanap u la ïalehkai ruh naduh dang rit, shuwa ba un ïoh jinghikai ha ka judo bad sambo ha ka kam shipai. U Abdulmanap u la aiti ïa la ka jingim ban hikai ïa ki khynnah samla ha Dagestan, da ka jingkyrmen ban ai ka lad ban ïaleh pyrshah ïa ka jingleh donbor jong ki nongshun kaba ju don ha katei ka thaiñ.
Ha u snem 2001, ka ïing ka sem jong u ka la kynriah sha Makhachkala, ka nongbah jong ka Dagestan, ha kaba u la pynlut ïa ka por ban shah hikai Wrestling naduh ka rta kaba 12 snem, bad ha ka judo naduh ka rta kaba 15. U la sdang biang ban pyntbit ïalade ha ka jingïalehkai combat sambo ha ka rta kaba 17 snem, hapoh ka jingpeit u kpa jong u. Katkum ka jingbatai jong u Nurmagomedov, ka jingkylla na ka jingïalehkai Wrestling sha ka judo ka long kaba eh, hynrei u kpa jong u u kwah ba un pynmlien ïa u ban ïalehkai ha ka gi jaket. U Abdulmanap u la long u coach ba rangbah na ka bynta ka kynhun ïalehkai sambo jong ka Republic of Dagestan, uba la hikai ïa ki katto katne ki nongïalehkai ha ka sambo ha Makhachkala, Russia.
U Nurmagomedov u la ju don bynta ha ka jingïashoh ïadat ha surok ha ka por ba u dang samla, shuwa ban pynleit jingmut ha ka Mixed Martial Arts. U Khabib u la ong, nalor u kpa jong u, ki don lai ngut ki nongïalehkai Sports kiba la ai mynsiem ïa u ki long ki nongïakura (boxer) jong ka America, u Muhammad Ali bad u Mike Tyson bad u nongïalehkai phutbol jong ka Brazil, u Ronaldo Nazário. U la batai ba u Fedor Emelianenko, u Maurício Rua, bad u Georges St-Pierre kum ki nongïalehkai MMA kiba u ieit eh ha katei ka por.
Ka jingsdang ïa ka jingim ha ka Mixed Martial Arts:
U Nurmagomedov u la ïalehkai nyngkong ha ka MMA ha u bnai Nailur 2008, da kaba khur saw tylli ki jingjop tang hapoh shibnai. Ha ka 11 tarik u Risaw, u la long u nongjop ba nyngkong eh jong ka Atrium Cup, hadien ba u la pynliem ïa ki lai ngut ki nongïakhun pyrshah jong u ha ka lympung ïakhun ha Moscow. Ha ki lai snem kiba bud, u la nang kiew shaphrang khlem da shah rem ha ki jingïakhun, da kaba pyndep 11 na ki 12 tylli ki nongïakhun pyrshah. Kine ki kynthup ïa ka jingjop lyngba ka ‘Armbar’ ha ka Round kaba nyngkong pyrshah ïa u Shahbulat Shamhalaev.
Ka rekod jingjop kaba 16-0 ha ki lympung ïakhun ha Russia bad Ukraine ka la khring ïa ka jingsngewtynnad na ka Ultimate Fighting Championship (UFC) ban soi ïa u Nurmagomedov. Hadien kata, u kpa jong u Nurmagomedov u la pynpaw ha ka jingïakren ba namar ka jingïakynad ha ka jingïateh kular bad ka ProFC ki la don 11 tylli ki mukotduma ha ka ïingbishar kiba ïaleh pyrshah ïa ka hok jong ka jingïateh kular jong u Nurmagomedov bad ka UFC. Hadien ba ki la rem hynriew sien bad jop san sien, ki la ïa poi sha ka jingïateh kular bad u Khabib u la lah ban bteng ïa la ka kam ha ka MMA.
Ultimate Fighting Championship; Ki jingïakhun UFC ba nyngkong bad ki jingpyrshang ban jop:
Ha kaba kut jong u snem 2011, u Nurmagomedov u la ïasoi ïa ka jingïateh kular ban ïakhun hynriew tylli ki jingïakhun ha ka Lightweight Division jong ka UFC. Ha ka jingïakhun ba nyngkong jong u ha ka UFC, ha ka 20 tarik Kyllalyngkot 2012, ha ka UFC on FX 1, u Nurmagomedov u la pynliem ïa u Kamal Shalorus lyngba ka submission ha ka Round kaba lai.
Hadien kata u Nurmagomedov u la jop ïa u Gleison Tibau ha ka 07 tarik Naitung 2012, ha ka UFC 148 lyngba ka rai ba ïa mynjur lang (unanimous decision), ha kaba baroh lai ngut ki nongbishar ki la rai jop sha u Nurmagomedov da 30-27.
Ka jingïakhun kaba bud jong u Nurmagomedov ka long pyrshah ïa u Thiago Tavares ha ka 19 tarik Kyllalyngkot 2013 ha UFC ha FX 7. U la jop khlem da phuh syep lyngba ka Knock Out (KO) ha ka round kaba nyngkong, watla u Tavares u la pyndonkam ïa u Drostanolone shuwa ban jam sha kane ka jingïakhun.
U Nurmagomedov u la pynliem ïa u Abel Trujillo ha ka 25 tarik Jymmang 2013, ha ka UFC 160 lyngba ka rai ba ïa mynjur lang (unanimous decision), ha kaba baroh lai ngut ki nongbishar ki la bynta ïa ka point da 30-27. Ha ka weigh-ins (por ba thew jingkhia), u Nurmagomedov u la tam palat ïa u pud ba la buh, da kaba khia haduh 158.5 lb. La ai por ïa u ar kynta ban pynduna jingkhia sha ka 156 pound, kaba dei ka jingkhia kaba khatduh ïa u nongïakhun ha ka Lightweight Division. Hynrei ha jaka jong kata, u la jied ban aiti noh khyndiat ïa ka bhah jong ka pisa kamai jong u sha u Trujillo bad ka jingïakhun la pynlong ha ka catchweight. Ha kane ka jingïakhun, u Nurmagomedov u la buh ïa ka rekod kaba thymmai jong ka UFC na ka bynta takedown (ban lympat ne pynur ha madan ïa u nongïakhun pyrshah) tang ha kawei ka jingïakhun, da kaba seisoh 21 tylli na ki 28 tylli ki jingpyrshang ban lympat ha madan ïa u nongïakhun pyrshah.
Ha ka jingïakhun kaba san jong u ha ka UFC, ha ka 21 Nailur 2013 ha ka UFC 165, u Nurmagomedov u la aireng pyrshah ïa u Pat Healy. U la synshar ïa ka jingïakhun bad u la jop lyngba ka rai kaba ïa mynjur lang (unanimous decision), ha kaba baroh lai ngut ki nongbishar ki la rai jop ïa u Nurmagomedov da 30-27. Hadien kane, ha ka jingïalang bad ki nongthoh khubor ba nyngkong jong u, u President jong ka UFC, u Dana White, u la ïaroh ïa une u nongïakhun MMA ba thymmai da kaba ong, “Kato ka jinglympat, da kaba u shu rah ïa u bad lympat pdik ha madan, ka rukom jong u Matt Hughes. Kane ka pynkynmaw ïa Nga ïa u Matt Hughes, uba rah bad lympat khlem pyrwa ïa ki nongïakhun pyrshah na shiliang sha shiliang ka Octagon. Une u khynnah u long uba shyrkhei. Ngi lah ban leh ïa kiei kiei kiba khraw bad une u khynnah.”
Ha u Nohprah, u Nurmagomedov u la kop ha ki rynsan social media ban ïa aireng pyrshah ïa u Gilbert Melendez, ha kaba la khmihlynti ba kine arngut kin ïa smak ha ka UFC 170 ka ban long ha ka 22 tarik Rymphang 2014. Hynrei kane ka jingïakhun ka la shah pynsangeh noh namar ki daw bym lah ban kiar, bad la bujli noh ïa u Melendez da u Nate Diaz. Hynrei kane ruh ka la shah weng namar ba u Diaz u la kyntait ban ïakhun. U Nurmagomedov u la pynpaw ïa ka jingsngewdiaw halor kane, da kaba ong, “Lada ki ong ba ki kwah ban ïa aireng bad kiba kynsai tam, kidei ban ïakhun bad kiba tbit. Lada ki kwah, Ngan ïakhun baroh arngut hapoh ka Octagon.”
Hadien kane u Nurmagomedov u la aireng pyrshah ïa u lahduh barim jong ka UFC Lightweight Division u Rafael dos Anjos ha ka 19 ïaïong 2014 ha ka UFC on Fox 11. U Nurmagomedov u la synshar khlem pyrwa ha baroh kawei ka jingïakhun bad jop lyngba ka rai ba ïa mynjur lang (unanimous decision), ha kaba baroh lai ngut ki nongbishar ki la rai jop da 30–27.
Ha ka 11 tarik u Nohprah 2015 la khmih lynti ba u Nurmagomedov un ïakhun pyrshah ïa u Tony Ferguson ha ka jingïalehkai ba khatduh jong ka The Ultimate Fighter 22 Finale. Hynrei u Nurmagomedov u la weng noh ïalade na ka jingïakhun ha kaba kut jong u bnai Risaw, da kaba pynpaw ba u don sa kawei pat ka jingmynsaw, bad la bujli ïa u da u Edson Barboza.
Kumta ka jingïakhun bad u Ferguson la pynbeit biang ha ka 16 tarik u ïaïong 2016 ha UFC ha ka Fox 19. Hynrei ha ka 05 tarik u ïaïong, u Ferguson u la weng noh ïalade namar ka jingshitom kaba ktah ïa ki tor. Ha ka jaka jong u Ferguson la bujli da u Darrell Horcher, ha kaba ka jingïakhun ka la long ha ka catchweight namar ka jingkhia kaba 160 lb. U Nurmagomedov u la jop ïa ka jingïakhun kaba noh shiliang lyngba ka TKO ha ka kylla kaba ar.
Ha u Nailur, u Nurmagomedov u la soi ar tylli ki kontrak na ka bynta ka jingïakhun pyrshah ïa u lahduh ba synshar ïa ka UFC Lightweight Division, u Eddie Alvarez, la ka long ha ka UFC 205 lane ha ka UFC 206, ha kaba u Dana White u la pynthikna ïa ka jingïakhun ha ka UFC 205. Pynban, ha ka 26 tarik Nailur, ka UFC ka la kylla ktien, da kaba pynbna ba u Alvarez un ïakhun ban ïada ïa ka burom pyrshah ïa u Conor McGregor. U Nurmagomedov u la pynpaw ïa ka jingbymsngewtynnad jong u ha ki rynsan social media, da kaba khot ïa u Alvarez kum u “lahduh ba kamkai” ne “bullshit champ” namar ba u la kyntait ïa ka ïa u bad jied ban aireng bad u McGregor, da kaba kynthoh ïa ka UFC ba ka dei ka “lympung jong ki khlehbiej”.
Ha ka jaka jong ka jingïakhun ban ïoh ïa ka nam lahduh, u Nurmagomedov u la ïakhun pyrshah ïa u Michael Johnson ha ka 12 tarik Naiwieng 2016 ha ka UFC 205. U Nurmagomedov u la synshar khlem jingmap ïa ka jingïakhun ryngkat bad ka kren artad ïa u Dana White, da kaba ong, ban ai ïa u ïa ka jingïakhun na ka bynta ka nam lahduh katba u dang kura jem ïa u Johnson, ha kaba u Johnson u la hap ban pyndem tdong bad rai rem noh ha ka Round kaba lai.
U Nurmagomedov u la ïakhun pyrshah ïa u Edson Barboza ha ka 30 tarik Nohprah 2017 ha ka UFC 219, ha kaba u la jop ïa baroh lai tylli ki round, da kaba lympat ïa u Barboza bunsien bad synshar ïa ka jingïakhun da kaba kura bad phuk bad phak ha madan. U la jop da ka rai kaba ïa mynjur lang, da kaba ïoh 30-25, 30-25 bad 30-24. Kane ka jingjop ka la pynïoh ruh ïa u ïa ka Performance of the Night bonus kaba nyngkong eh.
Lahduh jong ka UFC Lightweight; UFC 223:
Hadien ka jingbym seisoh ka jingthmu ban pynïakhun ïa u Khabib Nurmagomedov pyrshah ïa u Ferguson, Max Holloway, Anthony Pettis, ka UFC ka la bujli noh da u Al Iaquinta ban ïa aireng na ka bynta ka nam lahduh. U Nurmagomedov u la synshar khlem jingsalia ïa ka jingïakhun bad jop lyngba ka rai ba ïa mynjur lang (unanimous decision), da 50–44, 50–43 bad 50–43, bad u la kylla long u lahduh jong ka UFC Lightweight Division ha ka 07 tarik ïaïong 2018 ha ka UFC 223.
Ka jingïakhun kaba pawnam jong u Khabib Nurmagomedov pyrshah ïa u Conor McGregor ha ka UFC 229:
Ha ka 03 tarik Nailar 2018, ka UFC ka la pynbna ba u Nurmagomedov un ïada nyngkong eh ïa ka nam lahduh jong u ha ka Lightweight Division pyrshah ïa u Conor McGregor ha ka UFC 229 ka ban long ha ka 06 tarik u Risaw ha Las Vegas. Namar ka jingleh bad jingkren kaba pynbitar shuwa ban jam sha ka jingïakhun, u Nurmagomedov u la kut jingmut ban pynsajia da kaba tyngeh ïa u McGregor, ha kaba u la rah bad lympat la kum ba ïakhun bad u khynnah rit ryngkat bad ka kren artad. Ha ka Round kaba saw u McGregor u la hap ban pyndem tdong noh hadien ba u Nurmagomedov u la ïohlad ban ksih trait na ki bynta jong ka tyngam shyntur da kaba pyndonkam ïa ka buit ksih kaba la tip da ka “fulcrum choke” ban khur ïa ka jingjop.
Hadien ba ladep pynliem ïa u McGregor, da ka jingbitar u Nurmagomedov u la kiew ïa ka Octagon bad u la pyrshang ban ai jingsneng sa ïa u paralok jong u McGregor, u Dillon Danis, kaba la wanrah ïa ka jingklumar hapdeng kine ki ar tylli ki kynhun. Hadien ka jingïakhun pyrshah ïa une u rangïakhun ka Ireland, u Khabib u la nang pynjlan ïa ka rekod jong u sha ka 27 sien jop khlem da shah rem (27-0) kaba ha kata ka por ka dei ka jingjop lynter kaba jrong tam ha ka histori jong ka UFC. Ka jingïakhun ka la khring ïa 2.4 million ngut ki nongthied tiket, ka rekod kaba bun tam ha ki lympung ïakhun MMA.
Namar kane ka jingjia kaba pynkulmar, baroh arngut u Nurmagomedov bad u McGregor ki la shah bishar bad ha ka 29 tarik Kyllalyngkot 2019, ka NSAC ka la pynbna ban sospon ïa u Nurmagomedov haduh 9 bnai (ba la pyntreikam naduh ka 6 tarik u Risaw 2018) bad ka kuna kaba $500,000 ba u hap ban siew. Un sa ïohlad ban ïakhun biang ha ka 06 tarik u Naitung 2019.
Ka jingïakhun hapdeng u Nurmagomedov pyrshah ïa u Poirier: UFC 242
Ha u Jylliew 2019, u Nurmagomedov u la soi ïa ka kontrak ba thymmai bad ka UFC. Ha ka jingïakhun ba nyngkong jong ka jingïateh ba thymmai jong u, u Nurmagomedov u la ïada arsien ïa ka nam lahduh jong u pyrshah ïa u Interim Lightweight Champion (lahduh ba shipor) u Dustin Poirier ha ka 07 tarik Nailur 2019 ha ka jingïakhun ba kongsan (main event) jong ka UFC 242. U la jop ïa ka jingïakhun lyngba ka ‘Rear Naked Choke Submission’ ha ka round kaba lai. Ka jingjop ka la pynïatylli ïa baroh ar tylli ki Belt bad ka la pynlong ïa u Nurmagomedov ban khur ha ka sien kaba ar ïa ka khusnam Performance of the Night bonus. U Khabib bad u Poirier ki la ïakylliang jaiñ hadien ka jingïakhun kum ka jingpynpaw ïa ka jingïaburom. Haba ai jingkren hadien ka jingïalehkai u Nurmagomedov u la ong ba un die ïa ka sopti ba u Poirier u la ai ïa u bad un aiti ïa ka pisa kaba u ïoh sha ka seng ai jingïarap jong u Poirier. ïa katei ka sopti la die ha ka dor $100,000 bad ïa katei ka jingai sngewbha la pynïadei da u President ka UFC, u Dana White.
Ka jingïakhun hapdeng u Nurmagomedov pyrshah ïa u Gaethje; UFC 254:
La pynbeit ïa u Nurmagomedov ba un ïada ïa ka nam lahduh jong u pyrshah ïa u Tony Ferguson ha ka 18 tarik u ïaïong 2020 ha ka UFC 249. Kane ka dei ka sien kaba san ba la buh por ban pynïakhun ïa kine ki arngut, bad baroh arngut ki nongïalehkai ki don ha ka jingjop kaba 12 sien lynter ha ka UFC ha katei ka por. Hynrei u Nurmagomedov um shym la lah satia ban mih na Russia namar ka jingpyrkhing ïa ka leit ka wan da ki liengsuiñ namar ka khlam COVID-19, bad kumta la weng noh ïa u na ka card. Ha jaka u Khabib, u Ferguson u la ïakhun pyrshah ïa u nongïakhun ba hakhmat eh u Justin Gaethje na ka bynta ka nam lahduh ba shipor jong ka UFC Lightweight Division ha ka UFC 249, kaba la pynkynriah sha ka 09 tarik Jymmang. U Gaethje u la jop ïa ka jingïakhun da ka TKO ha ka Round kaba san, bad u la pynkut noh ïa ka jingjop kaba shi lynter jong u Ferguson bad ha kajuh ka por u la pynskhem ïa lade kum u lahduh ba shipor jong ka kyrdan Lightweight (interim champion) bad ban ïoh ïa ka jingïakhun na ka bynta ka nam lahduh pyrshah ïa u Nurmagomedov.
U Nurmagomedov u la ïakhun pyrshah ïa u Gaethje ha ka jingïakhun ban pynïasoh ïa ki Belt (unification bout) ha ka 24 tarik u Risaw 2020 ha ka jingïakhun ba kongsan (main event) jong ka UFC 254. U Nurmagomedov u la jop ïa kane ka jingïakhun lyngba ka ‘Technical Submission’ da ka ‘triangle choke’ ha ka wat kaba ar ban ïada bad pynïatylli biang ïa ka UFC Lightweight Championship.
Haba ai jingkren hadien ka jingjop, u Nurmagomedov u la pynbna ba un shongthait noh na ka jingïalehkai Mixed Martial Arts. U la batai ba u la kular ïa la ka kmie ba un ym bteng ban ïalehkai khlem u kpa jong u uba la khlad noh, “Ym don lad ba ngan wan shane khlem u kpa jong nga. Ka dei ka sien kaba nyngkong hadien kaei kaba la jia bad u kpa jong nga, haba ka UFC ka la phone ïa nga shaphang u Justin, nga la ïakren bad i mei jong nga lai sngi. Kam kwah ba ngan leit ïakhun khlem u kpa jong nga. Nga la kular ïa i ba kane kan dei ka jingïakhun kaba khatduh. Lada nga ai ïa ka ktien jong nga, nga hap ban bud ïa kane. Kadei ka jingïakhun ba khatduh jong Nga hangne.” Kane ka jingjop ka la pynlong ruh ïa u Khabib ban khur ïa ka khusnam Performance of the Night.
Ka jingshongthait bad ka jingweng noh na ka UFC Lightweight Championship
Watla la pyrshang ban ïakren ban wanrah biang ïa u na ka bynta kawei pat ka jingïakhun, u President ka UFC u Dana White ula pynbna ha ka 19 tarik u Lber 2021 ba u la pdiang ïa ka rai jong u Nurmagomedov ban shongthait noh bad la pynbna paidbah ba ïa ka UFC Lightweight Championship ladep ban pyllait.
Ha ka 01 Naitung 2022, u Nurmagomedov u la shah pynrung ha ka ‘UFC Hall of Fame’ ha ka jingïalang jong ka International Fight Week ha Las Vegas.
Hadien ka jingshongthait, u Nurmagomedov u la thied ïa ka Gorilla Fighting Championship (GFC), ka jingïalehkai MMA kaba don ha Russia, ha ka dor $1 million – bad u la pynkylla kyrteng ïa ka sha ka Eagle Fighting Championship (EFC).
Kum u MMA coach bad cornerman:
Hadien ba shongthiat ha u Risaw 2020, u Nurmagomedov u la kylla long u coach ha ka American Kickboxing Academy ba la ïalam da u Javier Mendez. U la long coach bad cornerman ïa u lahduh barim ka UFC Lightweight Division u Islam Makhachev, u lahduh barim jong ka UFC Welterweight Division u Belal Muhammad, u Zubaira Tukhugov (UFC), u Tagir Ulanbekov (UFC), u Gadzhi Rabadanov (Bellator), u Islam Mamedov (Bellator), u Saygid Izagakhmaev (ONE Championship), bad ïa u Abubakar Nurmagomedov (UFC), u Umar Nurmagomedov (UFC),bad u lahduh ba mynta jong ka Bellator Lightweight u Usman Nurmagomedov. U Nurmagomedov u la synran ruh ïa u Islam Makhachev ha ka jingïakhun ban ïada ïa ka UFC Featherweight Division pyrshah ïa u Alexander Volkanovski ha ka UFC 284 hynrei u la sangeh noh na kane ka kam ha u Kyllalyngkot 2023, ba kynthup ïa ka kam coach bad ban synran ïa ki nongïakhun kum u corner man, ban pynleit jingmut kham bun ka por ba ka ïing ka sem jong u.
Hynrei ha u 2025, u Nurmagomedov u la wanphai sha ka kam coach bad cornerman ha ka UFC 311 ha u Kyllalyngkot 2025 na ka bynta u Umar Nurmagomedov bad u lahduh ka Lightweight u Islam Makhachev. U la synran ruh ïa u Makkasharip Zaynukov, uba ïakhun ha u Naitung 19 tarik, 2025, ha ka PFL Champions Series 2.
Wat hapdeng ka jingshongthait jong u, u Nurmagomedov u la wanphai biang kum u cornerman na ka bynta u Makhachev ban ïada ïa ka nam lahduh kaba lai bad kaba saw pyrshah ïa u Dustin Poirier (UFC 302) bad u Renato Moicano (UFC 311), bad na ka bynta u Umar Nurmagomedov ha ka por ba u la ïakhun pyrshah ïa u Merab Dvalishvili na ka bynta ka UFC Bantamweight Championship. Ha u Risaw 2025, u la synran ïa u Ikram Aliskerov ha ka UFC 321.
