Patna, Naiwieng, 14: Ka Kynhun National Democratic Alliance (NDA) kaba bat ïa u lakam synshar ka la jop lai na ka saw bynta ha ka jingbun paid ha ka elekshon sha ka ïingdorbar thawan jong ka Bihar, da kaba jop 183 Seat ha ka ïingdorbar kaba don 243 ngut ki dkhot haduh mynta, katkum ka result ba la ïoh na ka website jong ka Election Commission.
Ka BJP ka la long ka party kaba heh da kaba jop haduh 83 seat bad dang lamkhmat ha ki 6 tylli ki constituency.
Ka Seng Saiñpyrthei JD (U) kaba ïalam da u Nitish Kumar kaba long ka paralok jong ka BJP, ka la jop 75 Seat bad ka dang tam ruh ha ki 10 tylli ki Constituency, katba ka party u Myntri ka Sorkar Pdeng u Chirag Paswan ka Lok Janshakti Party (Ram Vilas) ka la jop 17 Seat bad ka dang tam ruh ha ki ar tylli ki Constitueny.
Ka Hindustani Awam Morcha (Secular), ba la khlieh da u Myntri Rangbah barim u Jitan Ram Manjhi, ka la jop San Seat, ktaba ka party ba la ïalam da u Upendra Kushwaha ka Rashtriya Lok Morcha ka la jop lai Seat bad ka dang tam ruh ha kawei ka Constituency ha ka jingniew vote.
Ki Symbud Myntri Rangbah, kata u Samrat Choudhary bad u Vijay Kumar Sinha, bad ki Myntri Khynnah u Prem Kumar, u Maheshwar Hazari bad u Sanjay Saraogi bad ka Maithili Thakur na ka BJP ki la long ki kyrtong kiba kham pawkhmat ban jop na ka kynhun jong ka NDA.
U Nongïalam jong ka RJD bad u kyrtong Myntri Rangbah ka INDIA Bloc u Tejashwi Yadav, u khun jong u Mohammad Shahabuddin ba la khladnoh u Osama Shahab bad u Sandeep Saurav na ka CPI(ML) Liberation ki la long ki kyrtong kiba kham pawkhmat ban jop na ka kynhun jong ka Liang Pyrshah.
Ka INDIA Bloc ka la lah ban jop tang 32 Seat kat haduh mynta. Ka RJD ka la jop 23 Seat bad ka dang tam ha ki ar tylli ki Constituency, katba ka Congress ka la jop hynriew Seat, ka CPI(ML) Liberation ka la jop ar seat bad ka CPI(M) ka la jop shi Seat.
Ka AIMIM, ba la ïalam da u MP ka Hyderabad u Asaduddin Owaisi ka la jop san Seat.
Ka BJP bad ka JD(U) ki la ïakhun mar 101 Seats, katba ki paralok jong ka, ka LJP (RV) ka la pynieng kyrtong ha ki 28 tylli ki Constituency.
Ha ka kynhun jong ka INDIA bloc, ka RJD ka la ïakhun 141 tylli ki Constituency, katba ka Congress ka la ïakhun ha ki 61 tylli ki Constituency bad ka CPI(ML) Liberation ka la ïakhun ha ki 20 tylli ki Constituency.
