Shillong, Naiwieng 14: Ka All Meghalaya Karate-Do Association (AMKA) ka sngew sarong ban pynbna ba ka Larisha Kurbah ka la shah khot sha ka Senior National Coaching Camp ka ban long ha Sports Authority of India ha Lucknow.
Ka Larisha ka la jop bun tylli ki takma ha ki lympung ïalehkai hapoh ka jylla bad ka la wanrah ruh ïa ka burom ïa ka jylla Meghalaya ha ki lympung ïalehkai jong ka ri, kum ka jingjop takma ksiar ha ka India Open International Karate Championship 2023 ha New Delhi, takma rupa ha ka SEIKOKAI All India Karate Championship 2024 ha New Delhi bad ka takma rupa ha ka DEO HAH All India Karate Championship 2024 ha Guwahati. Ka jingjop kaba dang shen kadei ha ka Senior National Championship 2025 ha Hyderabad, ha kaba ka la ïoh ban khur takma rnong.
Kane ka prokram kilanmet ha Lucknow kan sdang naduh ka 17 tarik Naiwieng haduh 31 tarik Nohprah.
Ka Larisha kaba dang 19 snem ka rta, ka don ha ka thup ïakhun kumite -61kg ba marwei jong ki kynthei.
