Khliehriat, Naiwieng 14: Ka Sutnga SSCC kala bteng ïa ka jingjop jong ka haka jingïalehkai jong ka lympung phutbol Super Division Football Tournament-2025 da kaba pynliem ïaka Dhana CSC haka minit ba khatduh lyngba ka penalty.
Kane ka lympung kaba la tip ïaka kum ka 5th Kyrmen Shylla Contribution Trophy, la pynïaid daka East Jaiñtia Hills District Football Association (EJHDFA) bad ïa ki jingïakhun la pynlong ha madan Artificial Turf, Diengshynrum, Khliehriat.
Haba phai sha ka jingïakhun jong kane ka sngi, ka Sutnga SSCC kala jop da 2-1 kol ïaka Dhana CSC.
Ka Sutnga SSCC ka la ïoh ban lamkhmat ïa ka jingïalehkai lyngba u Sauni Phawa haka minit ba 13 hynrei ka Dhana CSC ka la jubab lyngba u Micheal Siangshai haka minit ba 23, kaba la pynlong ïa ka jingïakhun ban ïakhaid ha ka kylla step.
Ka jingïakhun ka la paw kumba kan jam sha ka jingïakhaid hadien ba ym shym la don satia ba lah ban pynkhihjar, hynrei dei ha ka minit ba khatduh ba ka Sutnga SSCC ka la ïoh ïa ka kabu kaba khraw da kaba ïoh penalty, ha kaba u Niponghi Sumer u la shimti bad pynrung jlang ïa ka kol pynjop.
Kawei pat ka jingïakhun ha kane ka sngi hapdeng ka Ladrymbai-B SC bad ka R.Shkenshynriah SC kala kut ha ka jingïakhaid khlem da don ba lah ban pynkhihjar (0-0).
