Jowai, Naiwieng 14: Ka resol jong ka jingïalehkai ha ka lympung phutbol ‘Super Division Football Tournament – 2025′ ïa kaba la tip kum ka “17 U Kiang Nangbah Memorial Trophy” bala pynïaid da ka West Jaiñtia District Sports Association, (WJDSA) Jowai kaba la long hynne ka sngi Thohdieng, 14 tarik Naiwieng, ha madan Kiang Nangbah Stadium, Dongmihsngi Jowai.
Haba phai sha ka jingïakhun jong kane ka sngi la ïohi ïa ka Khimusniang kaba la lah ban pynliem noh da 2-1 kol ïaka 7-Wasa United.
Ka Khimusniang ka la pynkhihjar nyngkong lyngba u Sanjini Dkhar haka minit ba 16 ban lamkhmat ïa ka jingïalehkai, hynrei ka 7-Wasa United ka la pynïakhaid lyngba u Arwanki Rymbai (49’) tang hadien katto katne minit ba la ïaid ka kylla miet.
Hynrei ka Khimusniang ka la ïoh biang ban lamkhmat lyngba u Risan Dkhar haka minit ba 75 kaba la pynskhem ruh ïa ka jingjop na ka bynta ka kynhun.
