SHILLONG, Naiwieng 14: Ka Ophis treikam jong ka SDO (Civil), Sohra Sub-Division ka la pynhap pyrda noh ïa ka Inter-Office Basketball Tournament da ka jingïalehkai phainal jong ki kynthei ha ka 14 tarik Naiwieng, 2025.
ïa kane ka lympung la pynlong ha madan Basketball jong ka St. John Bosco.
Ka jingïakhun phainal ka la long hapdeng ki nonghikai jong ka St. John Bosco bad ki nongtrei jong ka Shella C&RD Block Office.
Hadien ka jingïalehkai kaba itynnat, ka kynhun ki nonghikai jong ka St. John Bosco ki la ïohrah ïa ka namjop.
Ha kane ka sngi la wan sakhi lang ïa ka phainal da u M.A.Challam, ADC, i/c SDO (Civil), Sohra Sub-Division, uba la sam ïa ki khusnam sha ki nongjop, ha kaba u la ai khublei ïa baroh ar tylli ki team na ka bynta ka jingïashim bynta bad ka jinglong bad ka jingdon ïa ka mynsiem ïalehkai jong ki.
