Shillong, Naiwieng 14: Ha ka jingpyrshang ban kyntiew ïa ka jingkiew shaphrang jong ka jingïalehkai kriket hapdeng ki riewlum jong ka jylla Meghalaya, ka Apex Council jong ka Meghalaya Cricket Association ka la mynjur ban pynïar ïa ka jingkyrshan jong ka ïa ka Khasi Students’ Union na ka bynta ka lympung ïalehkai kriket kaba man la u snem, la pyntip u Honorary Secretary ka MCA u Rayonald Kharkamni hynne ka sngi Thohdieng.
Ka Maitshaphrang Khasi League ka dei ka lympung ïalehkai kriket T20 kaba mut ban kyntiew ïa kane ka jingïalehkai hapdeng ki samla Khasi bad ka bynta jong ka MCA kan long ban ai ka jingkyrshan ha ka liang ka jingstad bad kiwei pat katkum ka jingdonkam.
Ha kajuh ka rukom, ka MCA ka dang wad ïa ki lad ki lynti na ka bynta ban pynlong ïa kum kane ka lympung ïalehkai ha ki thaiñ Garo Hills, ha kaba u Vice President ka MCA u Sengnab Momin un ïalam ïa kane ka jingthmu, la bynrap biang u Bah Kharkamni.
Ka synjuk ïalehkai kriket jong ka jylla ka la wad bñiah bha ïa ki lad ki lynti ban pynshlur ïa ki samla trai ri trai muluk ban shim ïa ka jingïalehkai kriket, naduh ka kyrdan ïalehkai ha skul shaneng bad lyngba ki prokram kilanmet bad ki jaka pule ba kyrpang ha ki sor bad kumjuh ha ki jaka nongkyndong, katba ka dang plie beit ïa ka kriket sha baroh ki jaidbynriew.
Ka jingkyrshan ïa ka KSU ka long katkum ki kam pynroi kriket kyllum jong ka MCA kiba la pynlong ïa ka jylla ba kan lah ban sei ïa ki nongïalehkai ba kongsan jong ka thaiñ ha kane ka jingïalehkai.
