ïaroh ka Seng Samla Umling ïa ki Pulit Ri-Bhoi, dei ban bteng ka jingtalasi, daiñ kuna 6 lak

Nongpoh, Naiwieng 13: Ha ka jingbteng jong ki pulit ka Ri-Bhoi ban talasi naphang ïa ki kali pynkheiñ aiñ khamtam kiba dih buaid ha ka por ba ñiah kali, ka seng samla jong ka shnong Umling ha Ri-Bhoi ha ka jingïatreilang bad ki pulit hynnin ka miet ban talasi kala ai jingïaroh ïa ki pulit ka ri bhoi kiba la shimkhia ban mih surok na ka bynta ka jingshngaiñ jong ki paidbah, namar ka jingleh khlemakor jong ki katto katne ka wanrah bun ki jingjia ba sngewsih.
Haba kren sha ki lad pathai khubor na ka liang u Samla Reminold Mawrie President ka seng Samla Umling u Samla Banteiborlang Kshiar kila ai ka jingïaroh ïa ka jingshimkhia jong ki pulit ka Ri-Bhoi namar bun hi ki jingjia aksiden ki mih dei namar ka jingbuaid bad ka jingniah khlem akor ïa ki kali bad kaba kham sngewtynnad ka long ba ha ka jingtalasi ki pulit kam don satia ka jingleh shiliang wat ïa ki kali jong ki heh ki haiñ namar ka aiñ ka long salonsar ïa baroh.
Na ka liang ka seng samla kala kyrpad ruh ïa ki nongñiah kali ba kim dei ban dih buaid ha ka por ba niah kali bad ha ka juh ka por kila shim ruh ka kabu ban kyrpad ïa ka NHAI ba ka dei ban maramot ïa bun ki bynta u surokbah National Highway ha ki jaka ba la jot rathai namar kane ka buh jingma shikatdei iaki paidbah ba leit ba wan.
Ha kawei pat ka bynta ha ka jingtalasi ki pulit ba la sdang naduh 6 baje janmiet haduh kumba 10:30 eiei ki pulit kila ïoh ban daiñ kuna kumba 6 lakh eiei bad kane ka jingtalasi kan dang bteng ha ki sngi ban wan ban pynthikna ba ka surok bah kan long kaba shngaiñ ha ka leit ka wan bad lait ruh na ki jingjia aksiden.