Jowai, Naiwieng 13: Ki samla pule hapoh ka lama jong ka Kiang Nangbah Govt. College Student Union, Jowai ha kane ka 12 tarik u Naiwieng, 2025 kila pynlong ïa ka jingrakhe lehkmen ïa ka ‘Fresher’s Meet, 2025’ ha ka jingïalang ba la pynlong ha phyllaw jong katei hi ka College.Ha kane ka sngi u myntri ka tnad jong ka koit ka khiah bad ka kam ïalehkai Sports u ma Wailadmiki Shylla ula long kum u kongsan, ha ka jingdonlong ka symbud kongsan ka C.H Momin (MSC) Assistant Commissioner, u Principal i/c ma H. Toi, ki nongïalam ka KNGCSU bad ki samla pule jong ka College.
U ma Wailadmiki haba ai jingkren ula pynpaw ka jingsngewkmen ban ïadon bynta lang ha kane ka sngi, ula kyntu ruh ïa ki samla pule ka Union ba kin trei shitom khnang ban pynlong ïa kane ka College kaba bha tam hapoh ka jylla bad ha ka thaiñ North East hi baroh kawei.Na ka liang u ma Wailad ula pynsngew na ka liang ka sorkar kala dep ban Estimate ïa ka pisa kumba 31 klur ïa ka Kiang Nangbah Govt. College ban pynheh ïa ka Building jong ka College khnang ban biang ka jingpynrung klas ïa ki samla pule. Katba ïa ka jingdawa ban pynïoh ïa ka College Bus ïa kane la dep ban ïakren bad un wan ban aiti ïa ka da u Myntri Rangbah ka jylla bad ïa ka sngi yn sa pynbeit.
Kum ka dak ban pynphuh shuh shuh ïa kane ka sngi rakhe Fresher’s Meet u myntri ula synñiang haduh 50 hajar tyngka. Ula pyntip ruh ïa u mot ba sawdong ha ka dur u Kiang Nangbah bad ki jaka shongkai yn tei ha lad jong ka Kiang Nangbah College ha ka jaka jong ka MTC Jowai. Ha kane ka sngi ki samla pule kiba shim bynta naduh ka jingrwai, ki jingshad tynrai bad ka jingrwai National Anthem da ki khynnah NCC Cadets. Katba ïa ki kyntein ai khublei la ïoh na u Pynkmenlang Suchiang General Secretary ka KNGCSU.
