Nongstoiñ, Naiwieng 12: Kum shibynta ban rakhe ïa ka sngi ba la tip kum ka National Legal Services Day, ka ophis treikam jong ka District Legal Services Authority (DLSA) West Khasi Hills District Nongstoiñ, ka la pynlong ïa ka prokram ai jingbatai pynshai halor ki aiñ bad ki hok ha ka longbriew manbriew.
Ïa kane ka jingïalang pynsngewthuh paidbah halor ki aiñ, la ïoh ban pynlong hapoh ka hall jong ka Ophis treikam u BDO Mawthadraishan Block ha Nongshillong Eastern West Khasi Hills District. La sakhi ïa ka jingdon ki paidbah nongshong shnong ban wan sngap bad shah skhor ïa ki jingbatai pynshai.
Ha kane ka sngi, ki riew shemphang na ka Ophis DLSA kiba kynthup ïa ka ALADC kong L.Nongrem, kaba la ai ka jingpynshai halor ka Free legal Aids Counsel kaba ai jingïarap khlem da donkam ban siew pisa sha kito kiba wan na ka longïing longsem kaba duk, kiba shah pynngat ha ki kyndon ka aiñ, ki jingïarap kiba ka DLSA ka ai ki kynthup ïa ki kam mokotduma kum ki criminal cases bad kiwei. Kumjuh ruh la ïoh ïa ka jingpynshai paidbah ha kaba ïadei bad ki aiñ ïada ïa ki kynthei na ka jingshah thombor.
Katba na ka liang ka tnad Pulit Mairang lyngba ka kong A.Thongni WPSI ka la pashat ïa ki symboh jingbatai halor ka phang jong ka NDPS Act 1985 bad ka jingshah ktah ka imlang sahlang na ka jingjyllei jong ki kam thom bor ïa ki kynthei. Shuh shuh la ïoh ruh ïa ka jingpynsngewthuh paidbah shaphang ka aiñ POCSO Act na ka kong E.Myrthong Legal Aids Council.
Ka jingthmu jong kane ka prokram ka long ban hikai ïa ki nongshong shnong, ba kin sngewthuh ïa ki kyndon aiñ bad ban pyntip paidbah ha kaba ïa dei bad ka hok jong ki, kiba long ki lad jingïarap na ka Ophis DLSA. Ha kajuh ka por ka long ruh ban pynsngewthuh ïa ki paidbah nongshong shnong halor ka jingdonkam ïa ka jingïatreilang ha ka imlang sahlang ban wanrah ïa ka shong suk shong shngaiñ.
