Jowai, Naiwieng 10: Ka Chiehruphi SYWSC bad ka Sutnga SSCC ki la jop ïa la ki jong ki jingïalehkai jong ka lympung phutbol Super Division Football Tournament-2025, ba la pynïaid daka East Jaiñtia Hills District Football Association (EJHDFA), kaba la long hynne ka sngi Nyngkong, 10 tarik u Naiwieng, 2025 ha madan Artificial Turf, Diengshynrum, Khliehriat.
Ka Chiehruphi SYWSC kala jop da 2-1 kol ïaka Ladrymbai-B SC ha ka jingïalehkai kaba nyngkong. Dei ka Ladrymbai-B SC kaba la pynkhihjar nyngkong lyngba u Kyrshanlang Pasi (62’) hynrei ka Chiehruphi SYWSC ka la pynïakhaid lyngba u Rigency Lapasam (64’) shuwa ba u Shanmi Bareh (79’) un pynbud ïa ka kol pynjop.
Ha ka jingïakhun kaba ar, ka Sutnga SSCC kala pynliem noh da 5-1 kol ïaka Thangskai Tiger SC. U Sauni Phawa u la long u namtam na ka bynta ka Sutnga, ha kaba u la thep hat trick kiba la wan haka minit ba 36, 51 & 84, katba u Niponghi Sumer (76’) bad u Jeffrey Surong (90+4) ki la bynrap mar kawei. Ïa ka shikol na ka Thangskai Tiger SC la thep da u Rukipaia Syrti (82’).
