Nongpoh, Naiwieng 08 : U MLA ka Nongpoh u Bah Mayral Born Syiem ba dei ruh u Chairman ka Health and Advisory Board ka sorkar jylla mynta ka sngi u la leit ban plie paidbah ïa kawei ka jaka sumar kaba la tip kum ka Pahambir Health and Wellness Centre haka shnong Pahambir Them ha Ri-Bhoi District.
Ha kane ka sngi ka jingplie ïa kane ka jaka sumar ban pynsuk ïaki paidbah khamtam ki longkmie ba armet bad kiba kha khyllung la sakhi ruh da ka jingdonlang u C Awasthi SDO ka Patharkhmah Civil Sub Division, ka Dr J Syiem kaba dei ka Doctor In charge ka Pahambir HWC, Bah Sensi Lyngdoh, Lyngdoh Raid Nonglyngdoh, Bah LS Pamshong Chairman Synjuk ki Rangbah Shnong Nongkhrah bad Nonglyngdoh, ki ophisar naka tnad ka koit ka khiah, ki nongïalam shnong lem bad ki paidbah nongshong shnong.
Ha ka jingkren jong u Bah Mayral Born Syiem ha kane ka sngi, u la pynpaw ïa ka jingkmen kaba khraw ban iohi ba ki paidbah jong ka thain ki dap da ka jingkmen hadien ba la lah ban tei ïa ka jaka sumar paidbah ha shnong Pahambir Them. U ong ba kane ka dei ka jingkyrkhu bad ka jingmyntoi kaba khraw na bynta ki paidbah, namar ka jingdon jong kane ka jaka sumar kan iarap shibun ha ka liang ka koit ka khiah, bad ka long ruh ka dak ba ka sorkar ka trei ban pynjan ïa ki jingshakri sha ki paidbah.
U Bah Mayral Born Syiem u la kdew ruh ba ka Ri-Bhoi District ka dei kawei na ki Aspirational District kiba ka sorkar pdeng ka phaikhmat kyrpang, khamtam ha ka liang ka koit ka khiah bad ka roi ka par, ban kyntiew ïa ka rukom trei bad ka jingshakri sha u paidbah. U ong ruh ba kane ka sngi ka dei ka sngi sah jingkynmaw, namar ka la pyni ïa ka jingkylla kaba khraw hapdeng ki sub-centre ba mynshuwa bad kiba mynta naduh ka jingdon ki nongtrei, ki jaka sah, haduh ka rukom sumar ïa ki nongpang.
U la ong ruh ba ka jingpynmang pisa jong ka sorkar na u snem sha u snem ka la nang kiew, khamtam haka tnad ka koit ka khiah bad ha kaba ïa dei bad ka jingpynpoi ïa ki jaka sumar ha man ki shnong, khnang ba ki paidbah kin ym mad jingeh shuh. Watla ki dang don katto katne ki jingduna ha kane ka jaka sumar, hynrei kum u MLA u la kular ba ryngkat ka tñad ka koit ka khiah, kin shimkhia ban pynbiang ïa baroh ki jingduna, khnang ba kane ka jaka sumar kan long ka jingmyntoi bad ka jingkyrkhu ïa ki paidbah, khamtam ïa ki longkmie ba armet ban kha khun ha ka jaka sumar jong ka sorkar kaba kham duna ka jinglut jingsep.
