Shillong, Naiwieng 08: U Symbud Myntri Rangbah ka jylla u Bah Sniawbhalang Dhar u la kyntu ïa ki samla ba kin pynleit jingmut ha kaba ïadei bad ka jingsengkam la jong ym tang ban shu wad ïa ki kam sorkar.
Haba kren ïa kane ha ka jingïakynduh bad ka seng NPYF ha Nartiang constituency u Bah Dhar u la ong, “Haba bteng ïa ka jingpule ym dei ban pynkut ïalade tang ha kawei ka thong. Lada ka jingthmu jong phi ka dei ban ttrei kam sorkar, phi la pynrit ïalade tang ha kane ka lad. Ka thong jong phi ka long kaba kongsan bha ym tang ba kadei ka ticket sha ka kam sorkar.”
U la ong, “Uwei u paralok ba na jylla Bihar, uba la leit college lang bad nga ha St Edmunds, hadien ba ngi la ïakynduh la kumba 18-19 snem ha ka party ïathoh nga la kylli kaei ka kam ha ka jingim jong phi, u la jubab ba u la iehnoh ïa ka kam sorkar kaba u la kamai T. 45,000 hajar ha ka shi bnai bad ong ba um lah satia ban pyndap ïa la ka jong ka ïing, hynrei mynta ba u la plie ïa ka dukan khapsñiuh ha Patna u la kamai haduh T. 3 lak ha ka shibnai, kane kadei kata ka kam sengkam lajong.”
Na ka liang u Symbud Myntri Rangbah u la banjur ïa ka jinglong kongsan ban don ïa ka thong la jong.
“Nga kyntu ïa ki samla ba kin pynleit jingmut ha ka kam la kadei ha ka kam ba dang leit skul ne ha kiwei pat ki kam.
U Bah Dhar u la maham ruh pyrshah ïa ka jingma naba pyndonkam palat ïa ka phone naba kane kan wanrah ka jingjot lada ym lah ban pyndonkam bha.
