Pynrem ka JSM ïa ka jingpyni bor ki Pulit, ai jingkyrshan ïa ka jingïakhih ka MCTODA

Khliehriat, Naiwieng, 07: Ka Jaiñtia Students Movement (JSM) Central Body ka la pynrem jur ïa ka jingsiat tear gas jong ki Pulit ha ka jaka paidbah ha ka miet shiteng synnia ka 5 tarik Naiwieng ha ka Shnong Mawryngkneng ha ka jingïakhih jong ka Meghalaya Commercial Truck Owners and Drivers Association (MCTODA) kaba la ktah jur ïa ki riew paidbah ba luilui kynthup ïa ki kynthei khynnah bad ïa kiba la tymmen ka rta.
Ka JSM ha u kyrwoh ba la phah lyngba u President Bah L.S Rymbai ka la ong ba ka jingpyndonkam da ki tear gas khlem da pynshong nongrim bha ha kaba ïadei bad ka jingshngaiñ jong ki paidbah ka dei ka jingpynkheiñ ïa ka hok longbriew manbriew bad ïa ki nongrim jong ka synshar paidbah.
“Kane ka jingsiat tear gas ka la ktah jur ruh ïa kiba bun balang khamtam ïa ki khynnah, ki tymmen bad kito kiba don hapdeng ki jingshitom kiba la don lypa. Ki briew kiba la shah ktah ki la ngat ha ka jingshitom, ka jingbym suk bad ka jingsyier ïa kaba ym lah satia ban pdiang ha ka imlang sahlang synshar paidbah,” u la bynrap.
“Ngi pynrem jur ïa ka Sorkar kaba la ailad ïa ki Pulit ba kin pyndonkam da ki tear gas ha ka jaka paidbah, kaba pynpaw shai ïa ka jingbym kheiñ snep ïa ka bha ka miat bad ka jingshngaiñ jong ki nongshong shnong. Kane ka jingleh ka pynkhein ïa ki kyndon jong ka synshar paidbah bad ka jingïakhih ba jaijai bad ngi dawa ïa ka Sorkar ba ka dei ban shim mardor ïa ki sienjam ban pynbeit ïa kane ka jinglong jingman,” ong u kyrwoh.
Ka seng ka dawa ruh ban pynlong ïa ka jingtohkit kaba bniah ha kaba ïadei bad kine ki jingsiat tear gas bad ban pynngat ïa kito kiba donkti.
Ka seng ka la dawa ruh ba ki bor ka aiñ ki dei ban ïoh jinghikai halor ki buit ban tem ïa ki jingïakynad bad ban tem ïa ki paidbah da kaba buh hakhmat ïa ka jingshngaiñ bad ka burom na ka bynta ki briew baroh.
Ka la dawa ruh ban pynduh noh ïa kino kino ki polisi jong ka jingpyndonkam ne ki jingbthah kiba ailad ban pyndonkam da ka bor pyrshah ïa ki riew paidbah kiba pynlong ïa ki jingïakhih kiba jaijai.
“Ngi ieng tylli bad ki briew bad ki nongshong shnong kiba shah ktah bad ngi khot ïa baroh ki nongshong shnong ban ïa snoh kti lang ban dawa ïa ka jingbishar hok. Ngi kyntu ruh ïa ka Sorkar ba ka dei ban shimkhia mardor ban weng ïa ki jingeh jong ka MCTODA bad ban pynthikna ban ïada ïa ki hok jong ki nongshong shnong,” ong u kyrwoh.