Albert Maring
Umdap Dumu, Ri Bhoi District
Haba jied ïa ki nongmih khmat, ngi dei ban jied da ki briew kiba dang biang ka sngi ka rta kiba dang shait dang khlaiñ ka met ka phat, ba dang sted ki kti ki kjat ha ka leit ka wan ban ai ka jingshakri ïa ki paidbah.
Ki nongmih khmat ki dei ban long ki briew kiba don ki kyrdan jingpule kiba biang, ki dei ban long ki briew kiba ïar ka jingnang ka jingtip kiba ïar ha jingmut jingpyrkhat, kiba stad kiba shemphang ha ki liang baroh, ki dei ban long kiba shlur kiba nud ban kren ïa said ïa ki mat ki bynta bapher bapher ha dorbar thaw aiñ, ban long ka sur jong ki paidbah.
Ngi dei ban jied ki nongmih khmat, da ki briew kiba don ka jinglong babha kiba sheptieng ïa u Blei, ki briew kiba beit kiba don ka nam ba bha, ngim dei ban jied ïa ki briew kiba don dak sniew, ne kiba bamsap bampong. Lada jied ïa ki briew kiba don dak sniew, kum ki ta ki briew kin buh jingeh ïa ki paidbah, kin wanrah jingma ïa ka imlang ka sahlang bad kin sa synshar donbor bad pynhiar kput ïa kiba ïaleh pyrshah bad ki, ynda ki la don ha ka bor kin mih bun ki kynrum kynram.
Ki nongmih khmat paidbah, ki dei ban long ki briew kiba don ka mynsiem ban shakri ïa ki paidbah da ka jingieid ym da ka jingleh donbor, ki nongmih khmat kim dei ban don ka mynsiem leh kput ne leh shilliang khmat ïano ïano, ki dei ban peit bad ïaraplang kumjuh ïa ki paidbah ym dei ban buh ka jingïapher ha ka synshar ka khadar ne ha kino kino ki bynta jong ka imlang ka sahlang ba ïadei bad ki paidbah, ki nongmih khmat ki dei ban long kiba wanrah jingbha bad jingkylla naduh ka roi ka par bad kumjuh ha ka shongsuk shongsaiñ jong ki paidbah .