Shillong, Naiwieng 07: Ka Rangdajied United FC ka la ïohrung sha ka phainal jong ka SSA Super Cup ba nyngkong eh da kaba jop 2-0 ha ka jingïakhun Semi Final kaba nyngkong pyrshah ïa ka Langsning, kaba la long ha ka janmiet jong ka sngi Thohdieng ha madan First Ground-SSA Stadium, Polo.
U Stephanson Pale (42′, 90’+1) u la pynkhihjar ha ki khyllipmat ba khatduh ha baroh ar kylla jong kane ka jingïalehkai kaba la pynlong ïa ka lahduh jong ka Shillong Premier League 2025, ka Langsning, ba kan khyllem noh na kane ka lympung.
Ka SSA Super Cup ka lympung ba thymmai ba la pynlong da ka Shillong Sports Association, ka bynrap sa kawei pat ka kyrdan ïakhun ban pynshongshit ïa ki nongkyrshan ba ieid ïa kane ka jingïalehkai, ha kaba ki hynriew kynhun ne ki klob kiba kynsai tam (Top 6) na ka Shillong Premier League 2025 ki ïakhun ha ka lympung ïalehkai kaba tang shi wait ne knockout.
Ka Langsning, kum ka lahduh jong ka SPL 2025, bad ka Shillong Lajong kaba wan kyrdan ba-ar (runners-up) ki la ïoh jaka ban rung beit beit sha ka semifinal, katba ka Rangdajied bad ka Mawlai ki la hap ban ïakhun lyngba ki playoff ban ïohrung.
Haba phaidien, ka Rangdajied ka la pynjot thiaw ïa ka Nangkiew Irat da 3-0 kol ha ka jingïalehkai playoff kaba nyngkong ha ka 31 tarik Risaw shuwa ba ka Mawlai kan pynliem ïa ka Sawmer da 5-4 ha ka tie breaker ha ka sngi ba bud namar ba ïakhaid da mar 3-3 kol wat hadien ka extra time.
Ka kol kaba nyngkong jong u Stephanson ka la tyngkhuh ïa u rangïalehkai ba shadien jong ka Langsning u Apborlang Kurbah shuwa ba ka bol kan rung jlang shapoh kol kaba la ailad ïa ka Rangdajied ban lamkhmat ïa ka jingïakhun shuwa ka por shongthait.
Haba wanphai sha ka kylla miet, ka Langsning ka la thaw ïa shibun ki kabu kiba shyrkhei hynrei ka la duna pat ban pyntreikam hok ïa ki, wat hadien ba ka jingbujli da ki nongïalehkai ba tur shakhmat, kum u Donlad Diengdoh bad u Samuel Phawa.
Ynda la jam sha ki minit pynjlan ïa ka kylla miet, ka Rangdajied ka la ïoh rah syndet syndet ïa ka bol shakhmat, ha kaba u Stephanson u la pyndonkam ïa ki kjat ba stet jong u ban pyllait jaka ïalade kham jngai na u nongïalehkai ba shadien ka liang pyrshah, bad nangta u la khyrwit tyngeh ïa ka bol da ka kjat kamon kaba la ïaid lait ïa u nongap kol ka Langsning u Rajat Paul Lyngdoh bad kaba la pynskhem syndon ïa ka jingjop na ka bynta ka Rangdajied.
Ha kane ka sngi Saitjaiñ, ka Lajong bad ka Mawlai kin ïa aireng pyrshah ha ka Semi Final kaba ar. Kane ka jingïakhun kan sdang ha ka por 5 baje janmiet.
Ka Lajong ka khlem shah rem ha ka SPL 2025 hynrei ka la jop tang san sien, ha kaba saw tylli ki jingïalehkai ka la ïakhaid, kaba pynlong ïa ka ban duh ïa ka nam lahduh. Kawei na ki jingjop ba pawnam jong ki ka long pyrshah ïa ka Mawlai ha ka 01 tarik u Risaw. Ha kane ka jingïalehkai ka Mawlai ka la lamkhmat da 3-0 kol tangba ka Lajong ka la wanphai ban pynkhihwin bad khur ei ïa ka jingjop da 4-3 ha ka rukom kaba itynnad.
