Tang hapoh shisnem la dep tei ïa ka Gallerry jong ka Stadium ha Thangsning la dep plie u CM bad MLA

Shillong, Naiwieng 7: Ka long kaei kaei kaba sngewtynnad ban tip bad itynnad ban ïohi ba ïa ka jaka shong ne ka Sitting Gallery jongka Stadium ha Thangsning, kaba hap hapoh ka Mawkynrew Constituency la dep ban tei tang hapoh shisnem.
Ka jingmang ban pynlut ha kaba tei ïa kane ka jaka shong ha katei ka stadium bad ruh ban pynbha ïa ka madan ka long palat 1 klur tyngka. La tei ïa kane ka Covered Sitting Gallery ha ka Madan Thangsning da u Contraktor bah Traibor Nongkhlaw uba na Thangsning hi. Namar ba u dei u trai shnong u shim khia ban pyndep ïa ka jingtei ruh hapoh ka por ba la buh.
Ym tang ba tei ïa katei ka gallery hynrei ha ki bynta ba shapoh katei ka gallery pat la shna ïa ki kamra ban khreh ki player, ki painkhana, ki kamra ophis. La sdang ban tei ha u bnai Naiwieng 2023 bad la lah ban pyndep ha u bnai Risaw 2024. La ïoh pat ban plie ïa kane ka Stadium da u Myntri Rangbah ka jylla u Conrad K Sangma ryngkat ka jingïadon lang u MLA ka Mawkynrew u bah Banteidor Lyngdoh ha ka 3 tarik Naiwieng 2025.
Ka jingkloi ban pyndep ïa ka jingtei bad ka jingpynbha ïa ka madan bad kitei ki kamra ban khreh bad ophis treikam kan ïarap ïa ki khun samla ba kin ïoh ban pynlong ïa ki tournament bapher bapher ha katei ka madan. Lyngba kane kan kyntiew ruh ïa ki khun samla ban ïoh sei ïa ki sap ki phong ba ki don ha ka jingïalehkai phutbol bad khlem pep kumba ka thaiñ ka la sei ïa ki nongïalehkai kiba mih khmat ïa ka jylla khlem pep lyngba kane ka madan ha kawei ka sngi kan sa sei ïa ki nongïalehkai ki ban mihkhmat ïa ka ri ruh.
Na ka liang u MLA u pynpaw ba un ïai kyntiew ïa ka thaiñ ha ki liang baroh naduh ki kam ïalehkai, ka pule dangle, kiwei kiwei ki kam pynroi pynpar bad khamtam ban ïatrei lang bad ki paidbah ha kino kino ki bynta ba ki donkam. U bah Banteidor u la ong “ Nga thrang da shisha ban ïohi ba ka Mawkynrew Constituency kan long ka nuksa ïa kiwei ha baroh ki liang na kata ka daw nga trei shitom ryngkat ryngkat bad ki paidbah bad ki Bor Synshar Shnong hapoh ka Mawkynrew Constituency ban wanrah ka jingkylla bad jingkiew hapoh ka Constiteuency ha baroh ki liang”.