SHILLONG, Naiwieng 06: Ka lympung ïalehkai ‘MLA Trophy Deuce Ball Tournament’ kaba nyngkong eh ba la pynlong da ka Sanmer Cricket Academy, ka la sdang hynne ka sngi Palei ha madan kriket ha Sanmer.
Kane ka dei ka lympung ïalehkai kriket ‘Deuce Ball’ kaba nyngkong eh ha Sanmer, kaba pynïasoh lang ïa ki kynhun ba kynsai tam jong ka East Khasi Hills District kiba ladep pynïasoh ïalade bad ka Shillong Cricket Association (SCA).
Kane ka lympung ka kdew ïa ka sienjam kaba kongsan na ka bynta ka Sanmer Cricket Academy, kaba la pynurlong ïa ka jingangnud kaba la slem bha jong ka ban pynlong ïa ka “Deuce Ball Tournament” hapoh ar bnai — kaba la urlong da ka jingaiti ka jingtrei shitom jong ki dkhot jong ka.
Haba kren ha ka jingïalang plie pyrda ïa kane ka lympung, u MLA ka Mylliem, Bah Ronnie V Lyngdoh, u la ong, “Ka kynhun ki thei-ïalehkai kriket jong ka ri India ka dang shu jop ïa ka World Cup. Ngi khmih lynti ïa ki nongïalehkai ha kane ka lympung ban nujor ïa ka jinglehkai jong ki bad ban ïaid shakhmat ha ka jinglehkai jong ki.”
U la kyntu ïa ki nongïalehkai kriket ba kin shimkhia bha ïa kane ka jingïalehkai bad buh thong ban mihkhmat ïa ka ri India ha kawei ka sngi. U la pynpaw ruh ïa ka jingkyrmen ba kin nang bun ki samla kynthei na ka jylla ki ban shimkhia ïa ka kriket. Ula pynksan ba ka kriket ka kham pawnam mynta bad ka plielad kham bun ïa ki nongialehkai ban ha ki snem 1980 bad ‘90.
U Bah Ronnie u la bynrap ruh da kaba ong, “Lyngba ka Sports, ngi lah ban wanrah ïa ka jingïadei paralok bad ka jingïatylli. Shim bynta da ka mynsiem kaba bha. Ki jingïalehkai ki dei ban pynïatylli ïa ngi baroh. Kumjuh ruh, ka sports ka ai ïa ka koit ka khiah bad ka pynkiar na ki jingdih kiba pynsniew.”
Kane ka lympung ka plie ruh ïa ka lad kaba thymmai ïa ki klob kriket ha kylleng ka jylla Meghalaya ban ïashim bynta ha ka MLA Trophy Deuce Ball ha ka sien kaba nyngkong eh.
Kin don haduh 25 tylli ki kynhun ban ïashim bynta ha kane ka sienjam kaba nyngkong. Ki kynhun kum ka Sports club kaba dang shu thaw thymmai ka Meghalaya Media United SC, ki kynhun jong ka Shillong Cricket Association bad WASOSI SCA, ka Nongpdeng CC, United Brothers CC, Mawsyiem CC, Blaze Brigade, Sohiong CC (Super Kings), Lagaan 2.0, Mawklot CC, Laimer 1/2 CC, S.S.C.T, Royal Challengers CC, Sohtyngab CC, Shibakha, SYM, Sanmer CT, Sanmer Youth, Turshaphrang CC, Momentum, Thynroit CC, IQRA CC, Mawklot Rainbow, Umjasai CC, Madanrting, Umjasai CC.
Ka 1st MLA Trophy Deuce Ball Tournament, Sanmer ka kular ban long ka jingrakhe ïa ka mynsiem ïalehkai, ka jingtreilang, bad ka jingïatylli bad ka imlang sahlang, kaba pyni ïa ka lynnong kaba thymmai ha ka jingpynroi ïa ka Deuce Ball ha Meghalaya.
