Shen yn dep ka Blue Print ban ïa pynbeit bad ka HPC shwa ban pynkynriah na Them ïew Mawlong

Shillong, Naitung 3 : Ka High Level Committee (HLC) hapoh ka jingïalam jong u Symbud Myntri Rangbah bah Prestone Tynsong ka la ïakynduh ha ka Sngi Thohdieng ba la dep ban bud dien haduh katno ka tnad Urban Affairs bad Municipal ki la dep pynkhreh ïa ka Blueprint na ka bynta ban pynkynriah ïa ki 342 tylli ki long ïing jong ki Harijan na Them ïew Mawlong.
Haba ïakren ha ka sngi thohdieng ula ïathuh “ Kumba ka paw shen yn sa pyndep noh ïa kane ka Blueprint bad hadien ba la dep yn sa khot ïa ki nongïalam ka Harijan Panchayat Committee (HPC) ban pyni ha ki ïa kaei kaba ka sorkar ka la pynkhreh na ka bynta ban pynkynriah noh ïa ki”.
“ Nga la bthah ïa ki tnad ba dei peit ban pyndep kloi ïa kane ka blueprint ban ïoh bishar bniah biang sa shisien da ka sorkar shwa ban khot pat ïa ki nongïalam ka HPC ban pyni ïa kaei kaba la dep pynkhreh da ka sorkar ban pynkynriah noh ïa ki na Them ïew Mawlong. Hadien kata lada jia ba kim mynjur ïa kaei kaba la pynkhreh da ka sorkar ka kam ban pynïa pynbeit khatduh kan long beit hakhmat ka ïing Bishar kumta ka shong ha ki mynta” ong u bah Pretone Tynsong.
Kane ka Blueprint kan sa batai lut ïa kaei ba ka sorkar ka ïeng ha nongrim halor ki jingdawa jong ka HPC.
Lah ban pynkynmaw ha ka 25 tarik Iaiong 2022 ka HPC ka la mynjur ban pynkynriah noh ka sorkar na Them ïew Mawlong halor ki kyndon ban ai jaka ïa ki ban shna ïing mar 200 square meters kata na ka bynta ki 342 tylli ki longïing bad ka dei ban long ruh hapoh ka European Ward.
Hynrei ka la don ka jingpyrshah ba jur na ka liang ki seng bhalang halor kane ka jingdawa ka HPC bad ki la maham tyngeh ruh ba ka sorkar kam bit da lei lei ruh ban pyndep ne pdiang ïa kitei ki jingdawa jongki.