Shillong, Naitung 03: U Myntri Rangbah ka jylla u Conrad Sangma ha ka sngi Saitjiañ jong ka 2 tarik Naitung 2022 u la plie ïa ka Annual General Meeting of Officers Association, North Eastern Circle, State Bank of India ha U Soso Tham Auditorium, Shillong.
Haba kren ha kane ka jingïakynduh lang jong ki ophisar, u Myntri Rangbah u la ñiewtang ïa ka matti kaba u kpa jong u, u PA Sangma u la leh kata ban wanrah ïa ka Regional Office jong ka State Bank of India na Kolkata sha Guwahati da kaba ong ruh ba ki bank ki don ka bynta kaba kongsan bha ban pynthikna ba ki kam bad ki projek ka sorkar ki treikam kumba la khmih lynti. “Kiba bun na ki prokram bad ki skhim na ka sorkar jylla bad ka sorkar pdeng ki nongïoh jingmyntoi ki donkam donkam beit ban don la u Bank Account, namarkata, ka long kaba donkam eh ia ki bank wat ha ki jaka ba kyndong ruh na bynta ba kine ki prokram bad ki skhim yn lah ban pyntreikam kumba angnud” ong u Myntri Rangbah “bad kum ka sorkar ngi mad ka jingeh kaba khraw namar ka jingbym don ki bank ha ki jaka nongkyndong na bynta ban pyntreikam ïa ki skhim bad ki prokram ka sorkar” u la bynrap shuh shuh.
Shuh shuh u Myntri Rangbah u la ong ruh “ki bank shimet bad ki bank sorkar ruh ki donkam ban kynmaw dngoh ba ka kam kynshew pisa bad ka kam shakri ngim dei ban klet ïa ka bynta ba kongsan eh jong ki kata ban ai ka jingshakri kaba paka”
U Myntri Rangbah u la kyntu ruh ïa ki ophisar ba wan shim bynta ha kane ka jingïakynduhlangba kin pyrshang ban pynjanai ïa ka rukom sharki da kaba wanrah da ki buit thymmai, ban shakri da ka jingieid, bad ka jingsngur khnang ba ki paidbah kin don ka jingsngew hun mynsiem.
Shuh shuh u Myntri Rangbah u la ong ruh ba ki ophisar jong ka State Bank ki don ha ka kyrdan kaba ki lah ban pynkylla ïa ka rukom ai jingshakri jong ki bank namar ki paidbah ki ai jingshaniah kaba paka tam ïa ka State Bank. “Ka State Bank of India ka don ïa kata ka jinglah jong ka ban long kawei na ki bank ki a paw ha ka pyrthei bad phi don ruh ka kabu ban pynkylla ïa ka rukom ai jingshakri ïa ki paidbah da kaba don ïa ka thong, ka jingïohi jngai, ban kynjoh shata” ong u Myntri Rangbah.
Myntri Rangbah u la bynrap ruh “ka State Bank of India ka don kata ka jingshaniah kaba kyrpang na ki paidbah, ka jinglong ba la tbit ban ai jingshakri bad ka jingïar ki tnad ha kylleng ki bynta jonh ka ri tangba ka jingpyrshang ban pynjanai ïa ka rukom shakri ka donkam bad ka jingïasam ïa ki buit kiba ki la ïoh”
Shuh shuh u Myntri Rangbah u ong ruh ba ha ki thaiñ shatei lam mihngi ki dang don byllai bah kiba dang donkam ïa ki bank ban ai jingshakri ïa ki paidbah bad u la kyntu kynpham ïa ki bank na kin ïatrei ryngkat ryngkat bad ki sorkar jylla. Na ka liang jong u u la ai ruh ka jingkular ba na ka liang ka sorkar jylla Meghalaya kan ai jingkyrshan kaba pura ïa ki bank ba kin pynthikna na ki kam shakri jong ki kin poi wat sha ki jaka kiba kyndong tam eh jong ka jylla.
