Shillong, Naiwieng 03: Ka kynhun ïalehkai kriket jong ka Meghalaya ka la shah pynhap noh tang na ka bynta 102 ron ha ka Goa katba ka jingïalehkai jong ka lympung U-23 men’s Col CK Nayudu Trophy Elite Group ka la sdang ha madan keikrt jong ka MCA, Polo, hynne ka sngi.
Ha ka jingshisha, ka sngi kaba nyngkong jong ka jingïakhun kadei hynnin ka sngi kaba la shah pynthut noh, hynrei ka jingïalehkai ka la lah ban ïaid shakhmat hynnin ka sngi Nyngkong, watla tang hapoh 30 over.
Ka Goa ka la jop ïa ka jingkynting pisa (toss) bad ka la jied ban bol nyngkong bad ka rai ka long kaba dei namar ka jinglong jingman jong ka madan ka long kaba kordit ïa ki nongtied hynrei ka kham bha pat ïa ki nongkawang bol.
Hadien ba ka la pynkut noh ïa ka jingïalehkai jong ka Meghalaya tang ha ki 28.1 ober ka Goa ka la mad ïa kajuh ka jingkordit, ha kaba ka la duh noh ïa u Veer Yadav khlem da kamai ron, uba la shah pynhap noh ha u PM Santhosh. Hynrei ka jingsdang ban rben u lyoh bad kem dum kynsan la hap ban pynkut noh kloi ïa ka jingïalehkai, ha kaba ka Goa ka dang hap ban bteng na ka 4/1 ha ka tied.
Namar ka jinghap wiket uwei hadien uwei pat, ka Meghalaya ka sah tang ha ka 40/6, bad ka la don ha ka jingma kaba khraw ban ym kynjoh sha ka spah ron. Hynrei, u Manish Sharma u la ïalehkai da kaba phikir bha ban kamai 33 ron na ki 56 tylli ki bol (5x4s) kaba la khanglad ïa ka kynhun ban sahkut tang ha ka phew ron bad u la ïoh ruh ïa ka jingkyrshan na u Gavineal Marpna (22 na ki 24, 5x4s).
Hynñiew tylli ki wiket kidei kiba la khur da ki nongkawang bol ba stet jong ka Goa, ha kaba u Vinayak G Kunte (4/15 ha ki 8 ober) u la long uba seisoh tam na baroh. La ai bynta ïa ki nongkawang bol spin tang hadien katto katne por, hynrei, watla u Gavineal u sngewtynnat ban mad ïa ki bol ba kham suki, hynrei baroh arngut u Deep Kasvankar (2/14) bad u Anuj Yadav (1/14) ki la ïoh ban khur wiket.
Da kaba sah sa ar sngi, ka por ka dang biang ban ïoh ïa ka resol, katba ka suiñbneng ka dang ailad. Ka Goa ka sniewbok ban ïoh tied tang kawei (1) ka ober hynnin ka sngi hynrei ka Meghalaya kan khmihlynti ban pynkhyllem kham kloi ïa ki nongtied jong ka liang pyrshah mynta ka sngi.
