Rakhe dap 2 snem ka Marmaiñ Chirjap Asem VO, angnud ban dang kyntiew bad ai mynsiem ïaki longkmie

Nongpoh, Naitung 03: Ka kynhun Marmain Chirjap Asem Village Organisation kaba kdup kumba 10 tylli ki SHG kaba don haka shnong Marmaiñ Ri-Bhoi District, ka la rakhe kyrpang ban pynsah jingkynmaw halor ka jingdap kaba ar snem jong ka jingïaid lynti ka kynhun naduh bala seng ïaka ha u snem 2020 da ka jingangnud ban kyntiew ïaki longkmie kaba dei ruh ka thong jong ka sorkar kmie bad ïa katei ka jingrakhe la pynlong ha ïing Dorbar ka shnong Marmaiñ.
Katei ka VO tang hapoh ka 2 snem jong ka jingïaid lynti ka la lah ban thaw haduh 10 tylli ki SHG hapoh jong ka, ban seng ïaka kynhun ki longkmie na ka bynta ba kin ïeng ha la ki kjat na ka bynta ban seng kam lajong bad haka jing ïaid lynti kaba 2 snem katei ka Village Organisation ka leh shibun ki kam ki ba bha bad ki kam shakri paidbah hapoh katei ka Shnong khamtam ban kyntiew ïaki para longkmie.
La ioh ruh ban ot ïa u cake ha katei ka sngi kum ka dak ka jinglehkmen ha kaba u MLA ka Nongpoh Constituency u Bah Mayral Born Syiem u la shim bynta kum u kongsan haka jingdon ryngkat ka kong E Lyngdoh BPM C&RD Umling Block, u Bah Diren Klein Rangbah Shnong Marmain, lem bad ki nongkitkam jong katei ka VO ba kynthup ïaka President ka kong Manita Rahang lem bad ki nongkitkam jong kitei ki 10 tylli ki SHG.
Kum ka dak ka jingkyrshan lang ïaki longkmie ha katei ka shnong kiba la trei shitrhem ban ieng hala ki jong ki kjat naka liang u Bah Mayral Born Syiem u la aiti ruh da ka song pisa ha katei ka VO.
Haba kren ha katei ka sngi naka liang u Bah Mayral Born Syiem u la ai mynsiem ïaki nongïalam ka VO bad ki SHGs bapher bapher ha katei ka sngi ba kin dang lah ban trei shitrhem kham bha shuh shuh naka bynta ka jingmyntoi jong ki longkmie bad kumjuh ban wanrah ki jingkylla haka shnong ka thaw hi baroh kawei, ba kin lah ban seng ïaki kam ki jam, ban ïeng hala ki jong ki kjat bad kumjuh ban dang lah ban kner ïaki jingïarap sha kiwei pat ki para longkmie.
“Ki longkmie ki dei kita ki païa baskhem kiba don ka bynta kaba khraw ha kaban tei ïa ka longing kaba skhem, ka imlang ka sahlang kaba shngain bad ruh kiba shim ia ka jingkitkhlieh ban ri ban sumar iaka lawei ki khun ki kti” la ong.