Mih ryntih ki paidbah ban maramot ïa ka surok na Jaïaw sha Mawlai ha West Khasi Hills

Nongstoiñ, Naiwieng 02 : Ka synjuk jong ki samla jong ki lai tylli ki shnong ka Nongmawlai, Nongjaïaw bad Langsonthiang West Khasi Hills, kiba hap ha ka Mawshynrut C&RD Block kaba la tip kum ka Youth Development Organisation, ka seng kaba trei na ka bynta ka bha ka miat bad ka shong suk shong saiñ, ha ka sngi saitjaiñ ka 01 tarik Naiwieng, ka la lumlang ïa baroh ki dkhot bad ki paitbah ban maramot ïa ka surok kaba 3 kilomitar tam na Nongjaïaw haduh Nongmawlai.
Katei ka surok ka dei kaba la shna naduh ki snem ba mynshuwa lyngba ka skhim MNREGA, hynrei ka la sniew haduh katta katta ha kaba ki paitbah ki la shem jingeh haduh katta katta ha ka leit ka wan, ka kit ka bah khamtam eh ha ka por ba don kiba pang kiba shitom bad ki longkmie kiba armet kiba don kam ban pynpoi sha ki jaka sumar.
Ha katei ka sngi ki paitbah nongshong shnong ki la ïamih ryntih naduh ki samla, ki rangbah haduh ki longkmie hynrei kim shym lah ban pyndep wat tang ar shiteng ruh. Ki nongïalam ka YDO bad ki longkmie haba ïakren bad u nongthoh khubor ha katei ka jaka, ki la ong ba ha ka por ba dang dep shna ïa katei ka surok ki kali ki suk bha ban poi haduh Nongmawlai.
Hynrei suki suki na ka jingjur jong u slap ha ka por lyiur ka surok ka la nang sniew nang sniew bad ha une u snem lei lei, ki kali ki la shem jingeh bha ban iaid bad don teng teng ki kali kiba wan sha Nongmawlai la hap ban shu khynñiat da ki briew tang ban lait na ka jingsahkut.
Nalor kata ha marshiteng jong katei ka surok ka don ka wah Riangkhon kaba ym don jingkieng satia, ha kaba ki longkmie ki la ong ba ha ka por lyiur ba heh bha ka um, ki longkmie ba armet kiba mut ban leit ap kali ha Nongjaïaw ban leit sha ki jaka sumar kum ha Riangdo CHC bad Shahlang PHC ki sahkut bad ki shem jingeh haduh katta katta. Ki la ong ruh ba ki la don ki longkmie kiba kha khunlung ha shiteng lynti ruh.
Ha kaba ïadei bad ka jingsniew jong katei ka surok u bah Norbet Daju Secretary ka YDO, u la ong ba ha ka 20 tarik u bnai Jylliew 2025 ma u ryngkat bad ki para nongïalam jong ka synjuk ki la leit ban ïakynduh ïa u bah Methodius Dkhar MLA ka Mawshynrut bad ki la ai ha u da ka jingthoh ban kyrpad ba un pynsngew sha ka sorkar ba kan ïarap ban pynbha bad siang rong noh ïa katei ka surok, khnang ba ki paitbah nongleit nongwan kin lait na ki jingeh.
Nalor kata u la ong ruh ba utei u nogmihkhmat u la kular ba un sa shimkhia ban pynïoh da ka surok kaba biang na Nongjaïaw haduh Nongmawlai. Na ka liang u sordar jong ka shnong Nongmawlai pat u la ong ba lada katei ka surok ka la bha, kan long ka jingmyntoi kaba khraw ïa ki nongshong shnong jong ka Nongmawlai, namar ha ka jan bha ha ki jaka kiba itynnad jong ka Wahblei.
Lada ïaid da ka kjat tang kumba arphew minit la poi sha Wahblei ha ki jaka ba don ki kshaid, kiba itynnad kiba long ki jaka jngohkai kioba khring bha ïa ki nongshong suwari na kylleng ki jaka bad lada ka surok ka dei kaba bha ka ïoh ka kot jong ki paitbah kan kiew bha.
Nalor kata u la ong ruh ba ka shnong Nongmawlai ka dei ruh ka jaka kaba sei soh bha, hynrei bun ki mar rep kum ka kait, sohtrun, sohphan, sohñiamtra, ki jhur ki jep ki shu sep ei namar ka shem shitom ban shu kut da u briew.