Nongpoh, Naiwieng 01: Ban tem ïa kiba bun ki kam sniew kiba ktah ïa ka imlang ka sahlang jong ki shnong ha Ri Bhoi District, u Senior Superintendent of Police ka Ri Bhoi, u VS Rathore dang shen u la pynpaw ba u don kata ka jingangnud kaba khraw ba baroh ki VDP jong ki shnong bapher bapher ha Ri Bhoi kin pynïasoh bad ka tnad Pulit na ka bynta ban ïa khun pyrshah ïa ki kam sniew kiba long ka jingthud ïa ka shongsuk ka shongsain ki paidbah ha kane ka District.
Kumba la pynpaw dang shen da une u heh Pulit ka Ri Bhoi, u la ong ba ka tnad Pulit na Ri Bhoi ka ai khublei kyrpang ruh ïa ka sorkar jylla, kaba la pynkiew ïa ka mang tyngka na ka T. 300 sha ka T. 3000 shi bnai ban siew sha ki VDP khnang ba kin ioh ban pyndonkam ha kaba trei na ka bynta ka bha ka miat jong ka shnong ka thaw.
U la ong ruh ha Ri Bhoi district ki don kumba 600 tam ki shnong bad napdeng ki 600 tylli ki shnong la don haduh 300 tam kiba la wan ban pynïasoh VDP bad ka tnad Pulit, kaba dei katkum ka jingpynkupbor ka Meghalaya Police Act.
“Lada don hi ka jingïatrei lang ki VDP na man la ki shnong ka District, ka long shisha ka jingïarap kaba khraw ban pynduna ïa ki kam sniew ne wad ban pynduhjaid ïa ki kam sniew” ong u VS Rathore kum u heh Pulit ka Ri Bhoi, bad bynrap ruh jan baroh ki kam sniew ki mih na ki shnong ki thaw bad lada don ka jingïatrei lang ki VDP kumba la pynkupbor wat ki kam sniew kiba rit ruh kin nym ioh jaka ban rung sha ki shnong ki thaw” u la bynrap.
U la ong ruh ki paidbah ki lah ruh ban sakhi ba dang shen ruh ka tnad Pulit na Ri Bhoi ka khot ka wer ïa ki VDP ban pynrung kyrteng ha ka ophis jongu, namar ka thong hi ka long ban don ka jingïatrei lang ki VDP bad ki Pulit na ka bynta ban rad dyngkhong ïa baroh ki jaid kam sniew kiba mih ha ki shnong ki thaw.
Namarkata, u la bynrap ruh da kaba ong, ba ka tnad Pulit ka dang don ha ka lynti ba pynrung kyrteng lut ïa baroh ki VDP na ki shnong bapher bapher ha ka ophis jong u bad ki sa phai khmat ruh ban pynbiang ïa ki tiar ki tar kiba donkam bad na ka liang ka tnad Pulit ka ai mynsiem ïa ki VDP ba kin ïa trei lang na ka bynta ban ïa khun ïa ki kam sniew, namar tang ki bor pulit ka long shisha kaba eh ban ïa khun ïa ki kam sniew lada ym dei ba don kata ka jingïatre lang ki VDP bad ki nongïalam Shnong ka District, u la bynrap.
