Nongpoh, Risaw 29 : Shibynta ban pynkhreh bad pynduna ïaki jingshah lyngshop mariang, ka District Disaster Management Authority mynta ka sngi kala rakhe iaka National Day for Disaster Reduction haka jingïalang kaba la long ha Ri Bhoi College Nongpoh ban pynsngewthuh sha ki paidbah khamtam ki samla pule ban long kum ki nongiarap ba nyngkong haba don kino ki jingjia namar man u wei pa uwei u nongshongshnong u don ka jingkitkhlieh.
Ha katei ka jingrakhe ka Kong B Ranee ADC ka Ri-Bhoi kala shim bynta kum ka kongsan haka jingdon lang u Bah J Mawthoh DDMO, Ri Bhoi District, u AR Marak Assistant Commissioner, u J Rabha DSP Traffic, ka Dr E Kharkongor Principal Ri Bhoi College kem bad ki samla pule.
Ha katei ka sngi naka liang ka kong B Ranee ADC ka Ri Bhoi District kala ong ba balei ngi rakhe ïa kane ka sngi bala tip kum ka National Day for Disaster Reduction ka dei namar ki jingjia shah lyngshop kiba heh kiba la dep jia haka ri kum ki eriong, jumai bad kiwei kiwei kiba la wanrah ruh shibun ki jingduh noh ki mynsiem briew bad kane ka pynkynmaw ba ngi dei ban long kiba la pynkhreh bad phikir haba don kino kino ki jingjia shah lyngshop kiba kyrkieh naduh ka jingshah lyngshop mariang, ki jingjia aksiden bad kiwei kiwei.
Kumta kane ka dei kadei ka jingkitkhlieh jong baroh ki nongshong shnong ban long kum ki nongïarap haba don kano kano ka jingjia, khnang ba ngin lah ban pynduna ïaki jingiap briew bad ki jingmynsaw.
Ha katei ka sngi naka liang ki Aapda Mitra Volunteer kiba la ioh jinghikai kila pyni ruh kumno ka rukom ïarap kaba kyrkieh haba don kano kano ka jingjia shah lynshop ryngkat ki pulit jong ka Fire and Emergency Services.
