Nongpoh, Risaw, 28: U wei u heprit ba dang 14 snem ka rta, u la pynkut noh ïala ka jingim ha u tyllai phasi ha kawei ka jaka khlaw ha Ri-Bhoi District hadien ba u la jah nala ïing khlem wan phai ïing shuh naduh hynnin ka miet.
Katkum ka jingtip bala ïoh lum la ong ba utei u khynnah u la jah nala ïing naduh ka por 10 baje eiei mynstep jong ka 27 tarik Risaw, bad na ka liang ki bahaïing ki la pyrshang ban leit wad ïa u hynrei kim shym la lap satia, bad dei mynta ka step hadien ba ki bahaïing kim don lad shuh da kumwei ki la ujor da ka ejahar ha Nongpoh Police Station.
Hynrei tang hadien kumba katto katno por bala ujor ïa ka ejahar ki la bahaïing ki la ïoh jingtip ba utei u heprit u la sdien phasi ïalade ha kawei ka khlaw kaba don sha rudnong na ka ïing kaba u sah bad ïa ka met jong u la lap ïa u da uwei pat u khynnah u ba dang leit pom siej ha katei ka khlaw bad ha ka jingkyiuh utei u khynnah u la leit ban pyntip sha ki briew shnong kiba la pyntip pat mar mar sha ki pulit ban leh ïa kaba donkam.
Na ka liang ki pulit ka Nongpoh, ryngkat ki briew jong ka Forensic Crime Scene Unit ki la poi sha katei ka jaka ban bishar bñiah ïa katei ka jingjia bad ka jingiap utei u heprit bad hadien bala pynhap la pynkit noh ïa ka met jong u sha Nongpoh Civil Hospital ban leh ïa ka Post Mortem.
