Leh burom ka tnad Pulit Ri Bhoi ïa ki Pulit kiba la len lade ïa la ka jingim ha ka jingshakri

Nongpoh, Risaw 21: Ki Pulit ka District Executive Force (DEF) jong ka Ri Bhoi ha ka sngi Baar ki la kynmaw burom ïa ki Pulit kiba la long ki riewshlur bad ki riewlen lade ban aiti ïa la ka jingim ha ka jingshakri ban pynneh ïa ka shongsuk shongsaiñ.
Ïa kane ka jingkynmaw burom la pynlong ha phyllaw ka ophis u Senior Superintendent of Police ka Ri Bhoi, ha kaba la shim bynta da u Senior Superintendent of Police u VS Rathore, u Additional Superintendent of Police u Bah Orville Massar, ki heh Pulit bad ki bahaïing hasem jong ki Pulit kiba la duh noh ïa la ka jingim.
Ha kane ka sngi la ai burom ïa ki Pulit riewshlur da kaba leit buh syntiew kum kata ka dak ka jingsngew ieit bad burom ha kaba la shim bynta naduh u SSP ka Ri Bhoi lem bad kiwei kiwei ki heh ophisar.
U Senior Superintendent of Police u V.S Rathore haba kren ha kane ka sngi, u la ong ba kum ka tnad Pulit ka ai ka burom kaba khraw ïa kine ki riewshlur kiba la len lada ïa la ka jingim bad na ka bynta ka shongsuk shongsaiñ hapoh ka ri ki la mih kum ki riewshlur ban ïa khun pyrshah ïa kita ki nongshun kiba thmu ban pynthlot bor ïa ka shongsuk ka shongsaiñ hapoh ka ri.
U SSP ka Ri Bhoi, u la pynpaw ruh ïa ka jingsngewnguh kaba khraw ïa ki bahaïing hasem jong ki Pulit riewshlur kiba la ai ka jingkyrshan ha ki kam shakri jong ki bad na ka liang ka tnad Pulit kan nym klet ban kan ïai sngewnguh bad burom ïa ka kam riew shlur, ka jingtrei hok jongki ban len ïa lade na ka bynta ka ri.
Ha ka jingïalang, la pynlong ruh ïa ka jingsngap jar kaba shipor kum ka dak ka jingburom ïa ki Pulit kiba la kloi ban len lade ïa la ka jingim na ka bynta ka ri bad ka jaidbynriew.
Ki Pulit kiba la len lade ïa la ka jingim ha ka jingpyndep ïa la ka kamram ba la bynshet da ka Sorkar ki kynthup ïa u (L) Raymond P. Diengdoh (MPS), u (L) Birendra Kumar Deka (US ASI), u (L) Ram Bali Thakur (AB Constable) u (L) Richard Makri (AB Constable) bad u (L) Govin Rana (AB Constable).