Shillong, Risaw 21: U MLA ka UDP na Nongpoh u Bah Mayralborn Syiem u la pynpaw ka jingsngewhun bad ka jingïaid jong ka kam ka projek shna surok Nongpoh-Umden-Sonapur.
Haba kren sha ki lad pathai khubor ha ka sngi baar, u Bah Syiem u la ong ba ha ka wat kaba nyngkong jong ka surok kaba 20-kilometer kaba dei ka projek ba la bei tyngka da ka jylla ka kam ka la ïaid bad ka la long kaba ihun, da kaba khmih lynti ba yn lah ban pyndep ha u bnai Kyllalyngkot ne Rymphang u snem 2026.
U la pyntip ruh ba ka wat kaba ar jong ka surok, kaba hab hapoh ka Pradhan Mantri Gram Sadak Yojana (PMGSY) bad kaba jngai kumba 38 kilometer, la ïohi ba ka kam ka dang long kaba suki.
Ha kawei ka liang u Bah Syiem u la pynthikna ba ka jingïalang bad u contractor la dep ban buh khnang ban pynsted ïa ka kam tang shu la kut ka aïom slap.
U Bah Syiem u la banjur ruh kumjuh ïa ka jingdonkam ki lad ai jingïada haba wanrah ïa kine ki projek surok, da kaba kyrpad ïa ki nongñiah ba kin bud ïa ki jingbthah halor ka speed limit bad ban bud ïa ki kyndon ki pulit pynïaid kali.
“Nga kwah ban kyrpad, haba ïadei bad ka jingshngaiñ jong kiba ïaid lynti lyngba kane ka surok naba shisien ba ngi la ïoh ka surok kaba bha baroh baroh ki shah pynshoi ban pynher sted ïa ki kali. Watla ngi sngewtynnad ban ñiah sted ïa ki kali, hynrei ngin kynmaw ba kane ka jingsngewtynnad pat ka pynïap kumta ngi hap long kiba husiar bad kiba sumar bha. Ka jingkyrpad jong nga sha ki nongñiah kali, la ka long ki kali shimet ne ki kali kit paidbah ne ki taxi ba kin bud ïa ka speed limit kumba la batai, kaba kynthup ruh ïa ki 2 shaka ba ki hap donkam ban phong helmet manla ka por na ka bynta ki lad jingïada bad kumjuh ruh ki jingïada ïa kiba ïaid lynti,” bynrap u Bah Syiem.
