Sha u Amit Shah thoh ka HITO ban tuklar halor ka jingbteng shah thombor ki paidbah ha ki khappud

Shillong, Risaw 20 : Ka Hynniewtrep Integrated Territorial Organisation (HITO) ka la kyntu ïa u Myntri Kampohiing ka sorkar pdeng u Amit Shah halor ka jingkynnoh ba la pynkhein ïa ka hok longbriew manbriew halor ka jingïakajia khappud ka Assam-Meghalaya bad ban tuklar mardor khnang ban wanrah biang ïa ka shongsuk shongsain ha kane ka thain.
Ha ka shithi ba la aiti lyngba u Lat ka jylla ha ka sngi Nyngkong, ka HITO ka la ong, “Ngi kyrpad ïa phi ban leh eiei ïa kane ka kam da ka jingsngewkhia bad kyrkieh. Ka jingïarap kyrkieh ka long kaba donkam ym tang ban pynïoh biang ïa ka jingsuk hynrei ban ai ruh ïa ka hok bad ki lad ki lynti kiba neh na ka bynta baroh ki nongshong shnong kiba shah ktah ha shi lynter ka khappud Meghalaya – Assam.”
Ka jingïakajia pud ka Assam bad ka Meghalaya ka la neh naduh ba la seng ïa ka Meghalaya ha u snem 1971, kaba la wanrah ïa ki jingïakynad kiba jur, ka jingduh ïa ki mynsiem briew, bad ka jingjynjar ha ka liang ka ïoh ka kot jong ki nongshong shnong na baroh arliang. Wat la ka don ka jingïakren hapdeng ki ar tylli ki sorkar jylla, ki jingeh ki dang sahkut, ha kaba la kynnoh ba ka Assam ka wan ban pyndik ha ki jaka jong ka Meghalaya bad khanglad ïa ki nongrep ban leit lum ïa ki mar rep jong ki.
Ka HITO ka la kynnoh ruh ba ka sorkar Assam ka leh donbor da kaba kdew ïa ki jingjia ha Langpih ha u snem 2009 bad ka jingpynïap briew ha Mukroh ha u snem 2022. Ka la kynnoh ruh ba ka sorkar Assam, da kaba pyndonkam ïa ki jaitbynriew Karbi, ka la khanglad ïa ki nongrep na Meghalaya ban leit lum ïa ki mar rep jong ki kaba la ktah jur bha ïa ka kamai kajih jong ki nongshong shnong.
“Watla ki jingkular na u Myntri Rangbah ka Assam, u Himanta Biswa Sarma, kiba pyni ïa ka jingkular ban sangeh noh ïa kine ki kam thombor, ki jingpynthikna jong u ki la paw ba ki long ki bym shisha…” la bynrap shuh shuh ka kyrwoh.
Ka HITO ka la pynpaw ruh ba ki pud ki sam Hynñiewtrep ki shah teh ha ki kyndon ba la buh ha ka Instrument of Accession bad ka Annexed Agreement jong ki Jylla Khasi—ka jutang ba ka Sorkar India ka dang dei ban burom ïa ki soskular kiba la don mynta la palat 75 snem.
“Kane ka jingbym shimkhia bad jingpynkheiñ ïa ka hok longbriew manbriew ka la wanrah ïa ka jingbymhok kaba ïai bteng pyrshah ïa ka jaitbynriew Hynñiewtrep bad ïa ki nongïalamjong ki, kiba la shah pynduh noh ïa ka hok bad ka jingsynshar hi dalade,” la bynrap shuh shuh ka kyrwoh.