Ïohpdiang syrnot NQAS ki jaka ai jingsumar paidbah ka jylla ba lah ban ai jingshakri bha

Shillong, Risaw 19: Ka long ka jingsngew tynnad bad ka khyllipmat ban sahkynmaw ïa ka jylla hi baroh kawei, ba 10 tylli ki jaka ai jingsumar paidbah ha Meghalaya ki la ïoh pdiang ïa ka syrnot National Quality Assurance Standard (NQAS).
Katkum ka jingong ka Director of Health Services (MI), kane ka jingjop ka dei ka jingai sakhi ïa ka jingïatreilang kum ka kynhun, ka jingaiti lut bad ka jinglong nongïalam kaba don ïa ka thong da ki nongtrei ka koit ka khiah bad ki ophisar ba ïadon bynta lang ha kane ka kam ai jingsumar ïa ki paidbah.
Kine ki jaka sumar kiba la ïoh pdiang ïa ki syrnot ki kynthup ïa ka Ganesh Das MCH Hospital, Shillong, Marngar PHC (Ri-Bhoi District), Siju PHC (South Garo Hills District), Nongalbibra PHC (South Garo Hills District), Pomlum PHC (East Khasi Hills District); Asananggre PHC (West Garo Hills District); Babadam PHC (West Garo Hills District), Wagesi PHC (North Garo Hills District), Salmanpara PHC (South West Garo Hills District), bad Gabil PHC (North Garo Hills District).
Nalor kane, 91 tylli ki SC HWCs (AAM) ba don ha kylleng ka Jylla kila ïoh ïa ka syrnot NQAS katba ka Pastuer’s Institute-Central Laboratory bad ka State Foot Testing Laboratory kila ïoh kham hashuwa ïa ka NABL Accreditation, kaba nang pyni shuh shuh ïa ka jingaiti lut ka Meghalaya ban kyntiew ïa ka kyrdan ha ka liang ai jingsumar, jingshakri ki laboratory bad ka koit ka khiah ha ka imlang sahlang.
Ka tnat Health and Family Welfare ha ka kyrwoh khubor ka la ong ba kane ka jingjop ka pynphalang ïa ka jingangnud ka Meghalaya ban kyntiew ïa ki jingshakri ba bha ha baroh ki jaka sumar paidbah, ki jingshakri ha ka laboratory, bad ki community health Centre.
Ka Director of Health Services (MI) ka la ïaroh ïa ki riew shemphang ha ka koit ka khiah, ka kynhun ki doktor bad ki nongtrei kiba mih shakhmat halor ki jingshakri kiba khlem sangeh bad ki jingtrei shitom jong ki. Ki manager kiba la pyntbit ki la leh ïa ka bynta kaba kongsan halor ki kam ban tei, ki rukom pyrkhat kam kiba pynmih ïa ki soh kiba bha.
Katkum ka kyrwoh na ka tnat, ka Joint Directorate Committee (JDC), kaba kynthup ïa ki 3 tylli ki Directorate- ka DHS (MI), DHS (MCH&FW), bad DHS (ME&R)- ki la leh ïa ka kam kaba bha tam ban wanrah ïa ka jingai jingsumar kaba biang ha kylleng ki jaka jong ka jylla, lyngba ka jingdon ka Joint Directorate Quality Committee (JDQC).
Ka JDQC ka la lamkhmat ïa ki jingsdang ai jinghikai, ki jingleit jngoh sha ki shnong, ka jingshim jingkheiñ ïa ki jingai jingsumar, bad ki jingbteng ban leit sha ki jaka bapher bapher da ka jingai jingkyrshan ka MMDSL, NHM, bad ka jingkyrshan pisa na ka MHSSP bad MHIS, lyngba ki IPA programme jong ki bad ka insurance revenue bad ka jingïarap da ka District Quality Team, ka Health Engineering Wing, bad kiwei ki unit, ong ka kyrwoh na ka tnat.
Ka tnat ka la ong ba ka Ganesh Das MCH Hospital, kaba dei ka jaka sumar ïa ki longkmie bad ba sumar ïa ki khynnah ka la ïaid lyngba ki jingeh ba bun kum ka jingpynkha ïa ki khynlung bad kiwei ki jingsumar, ha kaba kane ka jaka sumar ym tang ba ka la ïoh ïa ka syrnot na ka NQAS, hynrei ka la ïoh ruh ka syrnot na ka Laqsha and Musqan Quality Certification halor ka OT, Labor room, SNCU & Paediatric Care Services. Kumjuh ruh ki PHC kiba don ha Marngar, Siju, Nongalbibra, Asananggre, Pomlum, Babadam, Wagesi, Salmanpara bad Gabil ki la sakhi ïa ka jinglong nongïalam ba khlaiñ, ka jingïatreilang kum ka kynhun bad kumjuh ruh ka jingaiti jong ki bad kumjuh ruh naduh ki jaka sumar ha ki shnong ki thaw ki lah ban mih shakhmat ban kynduh ïa ki kyrdan kiba biang ha ka ri halor ki jingtbit ki jingai jingsumar, ong ka kyrwoh khubor.