Ar tylli ki Model Public Library ba 3.10 klur tyngka yn ïoh ka Meghalaya na ka sorkar pdeng

Shillong, Risaw 19 : Ka Jylla Meghalaya kan sa ïoh haduh ar tylli ki ‘Model Public Library’ lane ki jaka pule kot kiba heh bad kham paka na ka National Mission on Libraries Scheme kaban kot sha ka 3.10 klur tyngka.
Kine ki ar tylli ki model library ba ka jylla ka ïoh ban pynbha bad pynheh shuh shuh ki kynthup ïa ka State Central Library kaba don ha Shillong bad kumjuh ïa ka District Libraryd kaba don ha Tura. Ïa kine baroh ar tylli ki Library yn bei tyngka na ka National Mission on Libraries Scheme kaba dei ka projek jong ka Ministry of Culture jong ka Sorkar Pdeng.
Ïa kane la ïathuh da u Myntri ka tnad Arts and Culture ka sorkar jylla, Bah Sanbor Shullai haba kren kum u Kongsan ha ka workshop kaba long ha Soso Tham Auditorium, Shillong halor ka phang, ‘Habit of reading as a tool for social development and economic upliftment’ ïa kaba la pynlong da ka tnad Arts and Culture jong ka sorkar jylla ryngkat ka National Mission on Libraries Scheme dang shen.
“Nga kyrmen skhem ba kane ka scheme kan ai ka jingmyntoi kaba khraw ïa kine ki ar tylli ki library bad khamtam eh ïa ki nongpyndonkam da kaba kyntiew kyrdan bad pynbha bad pynwandur katkum ka juk stad mynta,” u la ong.
Haba jubab pat halor ka jingkylli hadien ba la wai ka jingïalang, u Myntri u la ïathuh ba shen un sa leit sha Delhi ryngkat ki ophisar ban kynduh ïa ki bor ba dei peit na ka bynta ban buddien ïa kane ka skim.
“Nalor kane ngin sa pan skim ruh na ka bynta kiwei ki distrik ki bym pat don ïa ki library,” ong u Myntri.