U Conrad Sangma, Myntri Rangbah ka jylla, ula kren diaw mynsiem shibun eh, haba u ïakynduh ïa ki nongïalam shnong Lapangap, namar ba um lah ban ai jingbit, ba kin leit ot kba sha ki hali kiba heh jong ki, kiba don ha syndah jong katei ka shnong.
Kumta ka jingkylli, kaba lyngkot bad kaba shai bha, ka long “Mano ba thung ïa u kpa bad uta uba thung u dei ban ot, ym ba uba ot um dei satia u nongthung, namar ba katei ka dei ka kam tuh kam thiem”.
Ka Bible, ka kren shai, “kumba phi bet, kumta phin ot”, kumta halor kane ka mat, kaba ka sorkar jylla, lada ka don ka jingshlur, kan da pan ïa ka sakhi satar na ki trai shnong, ia ki trai jong u jyntang kba uba don mynta ha ki hali, kiba don sawdong jong ka shnong Lapangap bad lada u dei uba ki thung ki Karbi, kumta ki dei ban leit ban ot ïa uba ki la dep bet, hynrei lada ki thung ki Pnar, lane ki trai shnong jong ka Lapangap, kumta ki dei ban hiar sha ki lyngkha ki risai jong ki, ban leit ot ïa u kba, uba ki la dep thung.
Lada tang ïa itei i kam ruh, ka sorkar kam lah shuh ban pynbeit, kumta kat ka jingpynbeit pud lei te, ka la dei ka jingmutdur kaba la dei ban shu sdien ha ki haw haw bad kumta, ka la bha ban shu ai ïa u pita ha ka Assam, ba kan pruid dak, katba ka sngew mon.
Ngim da tip, ïa ka jingbun briew jong katei ka thaiñ Lapangap, hynrei na kaei kaba sngewthuh, ka long ba ki don ki hali kiba heh bha, ha syndah jong ki shnong jong ki bad dei na kitei ki hali, ba ki ïa ïoh ïa u khaw u kba bad ba ki pyni ruh ïa ka jinglong trai ïa ki jaka ki puta, kiba don ha sawdong jong katei ka shnong, hynrei lada ha kane ka kynti, kim lah ban kam trai ïa u kba, kumta ka pyni shai, ba kin nym lah ban kam trai ruh ïa ka khyndew.
Ki nongïalam jong kane ka sorkar MDA, ki kren kob sarong na ka por sha ka por, ba ka Lapangap, kam dei satia ka jaka ïa kajia, hynrei ka dei ha u pud u sam jong ka Meghalaya bad haba ki kren kumta, balei te ba kim nud ban pynurlong ïa katei ka jingkren jong ki ha madan, ha kaba kin ai ka jingïada kaba khlaiñ bad kaba skhem ïa kitei ki trai shnong jong ki; hynrei kine ki jingkren jong ka komiti ki ar jait bynriew lane kata ka status quo lane ka jingïakren ïa pynbeit bad ka sorkar Assam, ki dei tang ki kyntien tap eit miaw suda, ki bym don jingmut eiei ruh em bad ka jingjia jong ka shnong Lapangap.
Haba ïadei bad kane la ïohi ruh ba na ka por sha ka por ki jaitbynriew Karbi ki ïai bteng ban kam trai ïa ki jaka kiba don ha Lapangap bad ong ruh ba ka dang hab hapoh ka West Karbi Anglong Autonomous District Council.
Kum ka khana pateng ba ngi la ju ïohsngew mynshwa, kaba ngin pat lah ban tip pat haduh katno ka long kaba shisha naba ngim ïoh ïa ki jingthoh ba thikna, la ïathuh ba ki jaitbynriew Karbi mynshwa kidei kiba shu wan buhai shnong ne shu ap thap na ki Khasi Pnar kiba shong shnong ha katei ka thaiñ bad da kaba sngew synei ki la ai lad ïa ki ba kin buhai shnong, hynrei kine ki jaitbynriew Karbi katba nangmih ki Sngi bad sdang bun paid, mynta ki la kam trai syndon ïa katei ka jaka kaba haduh mynta, lyngba ka Karbi Students Association (KSA) ki la aidak bad pynpaw shai syndon bad katei ka jaka ka don hapoh ka histori jong ki, kaba mut ba kadei kaba la hiar pateng naduh ki kulong kumar, ki longshwa manshwa jong ki jaitbynriew Karbi jong ki.
Ka jingïakam trai ïa katei ka thaiñ na baroh arliang ka long ba mynta kaei kaba donkam hakhmat eh kadei tang lyngba ki kot ki sla, ki map, ne sakhi satar kiba shah hapoh ka aiñ, hynrei lada ym don ki sakhi ba biang ban pynbeit pud ha katei ka jaka kan ym lah ban long, hynrei satang da ka buit ban shu ïashim ne ïa ai (Give and take policy), ne da kaba shim ïa ka jingmynjur jong ki paidbah ne nongshong shnong katei ka thaiñ ba shano ki kwah ban leit.
Kumba ka long pat ïa ka Lapangap pat, katei ka shnong kam don satia ha ka thup kyrteng jong ki jaka ba don ha ka jingïakajia pud, kumta kam donkam kano kano ka jingïapynbeit, ka jingïaskud jaka ne ban sngap ïa kita ki Karbi kiba shu wan ap thap ba kin kam trai syndon ïa katei ka shnong bad thaiñ baroh kawei.
Kumba long mynta namarba ka elekshon ha Assam ka la jan la mih pat sa ka jingpynthikna jong u Myntri Rangbah ka jylla Assam u Himanta Biswa Sharma ba ka block 1 bad Block 2 kin hab beit ha Assam hapoh ka jingkhmih ka West Karbi Anglong Autonomous District Council.
