Nongpoh, Risaw, 17: Ban bteng ïa ka jingkyrshan na ka bynta ki Nongpang TB ban pynïoh ïa ki jingbam kiba tei met, ka ophis District Tuberculosis Officer, Ri-Bhoi District mynta ka sngi ka sam ïa ki marbam kiba tei met (Nutritional Food Basket) sha ki Nongpang TB kiba hap hapoh ka Umsning Tuberculosis Unit kiba dang don hapdeng ka jingsumar bad dih Dawai.
Ïa kitei ki marbam la lah ban sam sha ki nongpang TB ka dei lyngba ka jingshimkhia da u Deputy Commissioner ka Ri-Bhoi u Abhilash Baranwal, uba la shim khia ban ïa kren ïa ki nongpyniaid ïa ki Petrol pump lane ki retail outlet kiba kynthup ïa ka HPCL, BPCL bad ka IOCL ba kin ïarap ban kyrshan daki marbam sha ki nongpang TB kiba dang shah sumar.
Ïa katei ka program kaba la pynlong haka Auditorium Hall jong ka Umsning Town Dorbar la wan ban sam ïa ki marbam sha ki nongpang daka E. Pradhan, ADC ka Ri-Bhoi District, haka jingdonlang ka Dr. E Kalwing District Tuberculosis Officer, Ri-Bhoi, Kong Balakyntiew Umbah, President ka RAWA lem bad ki nongtrei na ka Umsning Tuberculosis Unit.
Kum ban shu kdew ïa ka jingïaid lynti ka ka Pradhan Mantri TB Mukt Bharat Abhiyaan hapoh Ri-Bhoi kaba dei ka program ban pynïoh ïa ki marbam sha ki Nongpang TB, haduh mynta ki la don haduh 47 ngut kiba kynthup ïa ki riew shimet bad ki kynhun kiba la ïa snohkti lang kum ki Nikshay Mitra ban pynbiang marbam na ka bynta ki 530 ngut ki nongpang TB.
Kumba la pyntip daki Doktor, haduh mynta Ki nongpang TB kiba dang don hapdeng ka jingshah sumar ki don 257 ngut bad napdeng kitei la lah ban kyrshan marbam haduh 243 ngut bad ki bym pat lah ban pynbiang ïa ki marbam ki don 14 ngut.
Ka Dr. E. Kalwing District Tuberculosis Officer Ri Bhoi, ka kyrpad ïa ki paidbah naduh ki riewshimet ki nongmihkhmat lane ki kynhun bapher bapher ba kin mih shakhmat ban kyrshan daki marbam kiba tei met ïa ki nongpang TB khnang ba yn lah ban rat diengkhong ïa kane ka jingpang.
